香港
台灣
北美

【經營3年】幼稚園突結業 楊婉儀再開新校:會同太空總署合作

即時娛樂 
2017-05-14 10:20:08 HKT

前港姐冠軍楊婉儀喺2014年同丈夫王帥勳及其他生意夥伴,合資喺紅磡開辦Golden Gate國際幼稚園暨幼兒園,最初學校強調關注雙非童長途跋涉跨境讀書,所以標榜會優先安排雙非兒童就就讀。

幼稚園經營3年,近日有《蘋果》讀者爆料指Golden Gate喺新年過後已經冇開門,見到學校貼上學校假期等字句,但入面嘅擺設已經清走。

楊婉儀今日喺數碼港出席活動,直認Golden Gate已經喺幾個月前已結業。楊婉儀表示:「現時有個新發展,嚟緊我哋會同美國NASA太空總署合作,喺今年2月已經着手搞新幼稚園,又或可稱呼做教育機構《STEAM》,focus喺6個月大至K3小朋友。我覺得香港嘅填鴨式教育,已經應付唔同小朋友日後嘅升學同工作,而我亦會逢星期六落學校教佢哋。」對於舊幼稚園錢債糾紛,楊婉儀就話已經交由律師處理,現時專注新發展。

不過,今年3月中,曾經有報道指楊婉儀呢間2月開辦嘅《STEAM》,疑未註冊營運,楊婉儀就解釋話:「教育局已經嚟過學校,我哋冇違規,係順利嘅!」


(左圖攝影:陳慧安)


楊婉儀今日喺數碼港出席活動(蘋果日報)


楊婉儀直認Golden Gate已經喺幾個月前已結業,而新校已經喺2月開辦(蘋果日報)


Golden Gate國際幼稚園暨幼兒園喺新年過後已經冇開門(蘋果日報)

相關新聞