香港
台灣
北美

10 Best Pick達人掃

周刊FaceUP 

Laura Mercier Blending Brush$320

妝品買到幾貴都好,掃具唔啱、掃法出錯就等於倒錢落海。
今期搵來 10妝師嚴選好工具,仲有保養 tips及逐格使用教學,等你偷師絕學!

礦物粉掃

Anjaylia化妝師 Meegan Shek
「礦物粉比碎粉粗,掃毛要比碎粉掃硬才可抓粉末。我的首選必屬 Laura Mercier,黑山羊毛夠硬又比人造毛有彈性,而且掃柄夠短夠粗,打圈掃粉時好好揸手。」


打圈掃面先沾取礦物粉於手背均勻推開,然後垂直打圈掃上面。


揸細掃頭鼻翼、眼肚等鬼祟位要用手指揸部分細掃頭上粉。

Meegan tips

化妝掃一旦變形就唔用得,清洗時,唔好用力壓到掃毛成九十度直角,洗完一定要平放。


眼影掃

Nike中國奧運國家隊廣告化妝師 Evelyn Ho
「呢支眼影掃得 1cm寬好啱亞洲人偏窄的眼窩形狀,做輪廓眼時可準確掃中眼窩凹位,而且天然毛質夠滑,好容易就沾取到眼影粉。」


Chanel Eyeshadow Brush N25$265


眼皮主色睫根掃上煙熏眼主色,然後由眼尾向內左右 blend鬆。


眼尾深色深色眼影左右來回掃於眼尾。

Evelyn tips

膠質柄會冇咁襟易甩毛,而我最愛木料柄,揸上手夠舒服。


左至右


濕粉掃

Angelababy化妝師 Will Wong
「上濕粉最怕掃到成面筆痕,呢支斜角粉底掃毛密度高、掃頭面積大、手柄短,容易施力,新手用印印吓嘅手法都可以掃得好均勻貼薄。」


兩泵全面泵兩下粉底液於掌心,由面頰向外掃,鼻翼用掃邊斜掃。


眼肚輕印垂直掃頭將粉底輕印入眼紋等微細位。

Will tips

粉底掃用完唔即刻洗毛即變硬,再用會唔貼面。其他掃最少一個月洗一次,想經濟啲,可用溫和洗髮水。


眉掃

Kary化妝師 Cyrus Lee
「眉掃以斜角款最好用,長度以約 5mm、毛質軟硬適中為最佳,方便你控制眉形兼掃出自然眉色。此掃的微斜角度好啱東方人眉形,畫眉底嘅線條特別順手。」


眉底畫線將眉筆顏色點印上眉掃,由眉頭開始於底部畫條直線。


向上推鬆由眉頭開始向上 Z形 blend鬆線條即成。

Cyrus tips

掃開叉即刻要整濕支掃,再用手梳番順,若晾乾後支掃仍然開叉,要買過。


胭脂掃

Bride's Talk創辦人 Janice Lam
「此 RMK胭脂掃用咗兩種滑溜嘅灰松鼠毛製成,平時垂直拍印只得個烘唔上色,呢支掃印上去卻超上色,夠彈性故上色同時唔會太實。」


凸位拍印垂直揸掃,於顴骨最高點拍印胭脂。


斜掃顴骨沿顴骨向太陽穴輕力掃,推散胭脂造出化開的自然效果。

Janice tips

化妝掃有纖維毛及動物毛兩種,前者毛質硬,線條最實淨,多用作粉底、唇、眼線掃等;後者較軟,多用於胭脂、碎粉或陰影掃。


唇掃

G.E.M.化妝師 Annie G. Chan
「唇掃我一定用 shu uemura。斜角偏圓兼夠薄,掃唇邊位角度啱啱好永冇出界,我連唇筆都唔使畫,直接用佢修唇形,一支過搞掂個唇妝。」


唇側畫起打斜支掃由上唇角掃向唇山,畫出 sharp唇線。


下唇中間唇膏點於下唇中央,然後左右推上色。

Annie tips

斜角掃頭接觸點最貼近輪廓,多用骨位如胭脂、陰影;平角掃線條實,適用於唇掃、眼線掃;圓角易掃層次感,多作暈染用。


碎粉掃

徐濠縈化妝師 Janice Tao
「佢係全行唯一一支用 100%松鼠毛造的碎粉掃,毛質軟熟膚觸特別舒服,唔似硬身碎粉掃會整花底妝。掃頭形狀屬少有的圓扇形,令碎粉更易黐上面,妝更薄。」


先掃全面先於全面由上而下左右拖拉掃碎粉。


後重點拍重點於額頭、下巴、 T位垂直支掃拍印碎粉,以防止出油。

Janice tips

迷你掃雖拎出街方便,但有些會縮細咗掃頭唔夠標準,掃上面時惟有掃多兩下,新手最好買番標準長度。


眼線掃

徐子淇化妝師 Gary Chung
「平時多用妝品附送工具,不過此市面少有的斜角眼線掃就長期傍身。呈三角形比一般尖頭掃更緊貼到睫根,呢支同眼睛成水平線畫線已好直。」


眼尾畫起眼尾向前畫 1/3條眼線,線條最順暢。


連接眼頭由眼頭向後畫眼線並連接到眼尾。

Gary tips

家唔少貴牌如 Chanel、 Dior等的附送嘅棉棒都已做得好有彈性又夠粗,做 blending都冇問題。


陰影掃

跨媒體插畫化妝師 Maysum
「此斜角陰影掃不單比平角掃更貼輪廓,毛質仲柔軟得來食到粉,掃一下已夠做自然修飾,當胭脂掃用亦得。」


手背推勻陰影忌重手,事前一定於手背掃走多餘粉末。


髮鬢掃起將斜角掃由髮鬢開始緊貼顴骨掃陰影。

Maysum tips

最基本必買扇形掃同胭脂掃!前者可以做暈染;後者掃出來的效果比粉撲自然,又可兼當陰影掃。


遮瑕掃

《盛女愛作戰》化妝師 Jessica Leung
「我幫班盛女化妝都係用佢。掃毛軟硬適中,有密有疏,前半段較薄尖可遮皺紋、雀斑細微位;後半段偏厚遮到暗瘡,分量好易控制。」


眼尾要剔沿淚溝掃上遮瑕膏,眼尾用尖端畫剔,對眼望落更精神。


先填後印向內填滿眼肚位,用手指印散遮瑕膏。

Jessica tips

洗完掃必須要乾透先可再用,亦唔可以用風筒吹,好傷掃毛。我用緊小型乾碗機哄乾掃具!


Chanel尖沙咀海運大廈 OT201鋪( 2736 3099)、 Cyber Colors銅鑼灣波斯富街 72-74號地鋪莎莎( 2895 6112)、 ink銅鑼灣禮頓道 111號 12樓 1201室 ZING the makeup school( 2147 5000)、 Kesalan Patharan中環威靈頓街 35B號 1樓( 2918 9206)、 Laura Mercier銅鑼灣時代廣場連卡佛專櫃( 2115 9693)、 Le Metier de Beaute中環新世界大廈地鋪 Joyce Beauty( 2869 5816)、 M.A.C、 SHISEIDO Makeup銅鑼灣崇光百貨專櫃( 2833 8338)、 RMK尖沙咀海運大廈 FACES專櫃( 2865 0941)、 shu uemura九龍塘又一城 UG08鋪( 2265 7582)

更多 Ketchuper 文章