› 選擇地區
三藩市
紐約
洛杉磯
其他美國地區

跟 ZombieBoy鬥 15遮瑕膏遮紋身

周刊FaceUP 

要數最近 facebook、微博瘋傳得最勁嘅短片,非 Zombie Boy代言 Dermablend美肌產品,用遮瑕膏變身乾淨男嘅廣告莫屬。
當然,要專業人士相助兼花上半日先有此鬼斧神工,但凡人如你同我每日只需要花上一分鐘,利用遮瑕膏遮走眼圈、痘印,即可急救殘樣。今次試盡 cream、棒及水狀,兼跟足 Zombie Boy搵嚟真紋身測試。

測試方法

遮瑕度:將遮瑕膏塗於星形紋身上,紋身變得愈淺代表遮瑕度愈高。
平滑度:把遮瑕膏塗於紋身上,測試其平滑度。
保濕度:利用水分測試機測試皮膚水分前後變化, before為 29.1%。


Before


After

Cream狀遮斑最掂

要學 Zombie Boy遮大範圍紋身,必揀 cream狀。此種遮瑕膚最潤,遮瑕力亦最強,易於推開又貼服,
最啱遮蓋雀斑等大範圍瑕疵,利用指腹微溫,將遮瑕膏「溶」入皮膚。


1隱形紋身

ESPRIQUE Dual Concealer UV SPF30/PA+++#01$190
遮瑕度:★★★★★完全遮晒、平滑度:★★★★又薄又滑、保濕度:★★★★★ 52.7%
總評:雙色設計可自由溝色,約 3層可完全遮晒紋身,且長時間厚搽亦冇起紋,頗濕潤效果最自然。



2連碎粉

Lunasol Palette Concealer$380
遮瑕度:★★★★效果理想、平滑度:★★★唔算難推、保濕度:★★★ 42.5%
總評:雙色連碎粉,一盒搞掂,質地有點偏乾要先上保潤度夠的 base打底,遮完掃上透明碎粉定妝, keep到大半日。



3溝色偏乾

ÍP SA White Protect-C Creative Concealer SPF25/PA+++$280
遮瑕度:★★★一層已遮到紅色紋身、平滑度:★★★用掃較易沾、保濕度:★★ 30.3%
總評:皇牌遮瑕膏,一盒 3色兼設間隔作溝色用,遮瑕力高一層已遮到眼圈,但質地偏乾,會卡住細紋,較啱遮暗瘡及斑位。



4似 mousse夠滑

Cyber Colors Protection Concealer Kit SPF 30 PA++$188
遮瑕度:★★★約遮 7成紋、平滑度:★★★★★似慕絲觸感頗滑、保濕度:★★★ 44.9%
總評:連盒有 2支細掃,方便重點遮瑕,樹脂成分令質地似 mousse,一推即溶入皮膚,貼服度最高,但妝感幾厚。



5搞掂眼袋

Shiseido Natural Finish Cream Concealer#3$210
遮瑕度:★★★★ 2層亦冇厚妝感、平滑度:★★★偏稀身幾貼、保濕度:★★ 35%
總評:牙膏狀較難控制,質地最稀身,用點按方法更貼皮膚適合遮眼袋,油性肌要用碎粉定妝,否則偏油易溶。



Stick狀重點遮瘡

外形似足唇膏的筆狀遮瑕膏,專針對暗瘡及紅印位置,因較乾身即使面對油性暗瘡肌亦不易溶化!使用時,只需輕力點壓,再以手指 blend開邊位。


6妝感自然

Lavshuca Stick Concealer N#Natural Beige$84
遮瑕度:★★★★效果平平、平滑度:★★★唔會卡粉、保濕度:★★★★ 51.5%
總評:質感幾厚,一定要用掃壓薄,否則出現結塊!



7唔均勻

Fasio Zero Expert UV Concealer SPF30/PA+++$78
遮瑕度:★★★效果唔均勻、平滑度:★★★太乾難推開、保濕度:★★★★ 48%
總評:質地太硬難推勻亦有少量乾紋,勝在保濕度夠,遮暗瘡一流,但邊位一定要 blend開,否則易有明顯邊印。



8現眼紋

Kate Stick Concealer#Light Beight$63
遮瑕度:★★★★遮走 7成紋身、平滑度:★★★唔算難推、保濕度:★★ 33.8%
總評:保濕力偏弱,點上後宜用手指印開,貼服度理想,但用於眼底易出乾紋。



9柔潤易推

Jill Stuart Stick Concealer#03hazelnut$220
遮瑕度:★★★★★遮走 9成紋身、平滑度:★★★★ 1/2一掂皮膚即溶、保濕度:★★★★★ 53.8%
總評:杏仁油等淨白成分夠滑,唔會太乾,即使橫向亦唔難推開,有少少光澤感,仲唔起裂紋,共 4色,但色號偏白。



10持久一般

Naris Up Bihadashi Spots Eraser Concealer$65
遮瑕度:★★★一下已遮大半、平滑度:★★筆尖太幼、保濕度:★★★ 34.3%
總評:極幼筆尖,遮癦及暗瘡印最佳,但持久度一般。



Liquid狀遮眼圈最得

秋冬天氣乾燥,遮完眼圈後好易出眼紋,得不償失。星級化妝師 Annie G.教路,水狀遮瑕較滋潤,
可於眼底輕點三下,並以指腹印開最佳。雖然遮瑕力普通,但加埋粉餅輕印定妝,亦可遮走大半瑕疵。


11海綿頭啱乾肌

shu uemura Point Cealer#medium light sand$210
遮瑕度:★★★★★遮瑕力極高、平滑度:★★★偏杰身、保濕度:★★★★★ 43.8%
總評:海綿頭觸感舒服,以手指印開遮瑕力亦夠,但注意分量不宜太多,易變厚,但保濕度最高,乾肌最啱。



12高持久度

M.A.C Pro Longwear Concealer#NC20$155
遮瑕度:★★★★紅色位遮晒、平滑度:★★★★偏 cream狀夠滑、保濕度:★★★ 35.3%
總評:新品,以高持久度作賣點,質地介乎液及霜之間,遮到大半眼圈及雀斑、紅印,效果幾全面。



13全礦物防敏

Jane Iredale Under-eye Concealer Cache-cernes#2$196
遮瑕度:★★★少許變色、平滑度:★★★★刷毛夠軟易畫開、保濕度:★★ 31.4%
總評:全礦物成分,色澤偏深,遮瑕後紋身位有少許偏黃,但夠天然,敏感肌放心用。



14專遮啡眼圈

Burberry Luminous Concealer#03$265
遮瑕度:★★★變淡大半、平滑度:★★★★筆尖夠冇留筆痕、保濕度:★★★ 34.5%
總評:矽膠彈性體成分夠貼面,妝感唔會死死實實,較啱遮啡色眼袋,不含香料,唔怕刺激眼部幼嫩皮膚。



15薄搽當 highlight

Sofina Alblanc Transclear White Bright Up Concealer$300
遮瑕度:★★★★★幾乎遮晒,勁!、平滑度:★★★★液狀夠稀及貼、保濕度:★★★ 36.6%
總評:可當 highglight及遮瑕用,雖保濕力唔算勁,但印開後含多重反射粉體,令瑕疵唔覺眼,薄搽即可!



Burberry、 ESPRIQUE、ÍP SA、 Jill Stuart、 Lunasol、 M.A.C、 Shiseido、 shu uemura、 Sofina Alblanc尖沙咀海運大廈 FACES專櫃(3188 2566)
Cyber Colors、 Fasio、 Kate、 Lavshuca銅鑼灣波斯富街 72-74號地鋪莎莎(2895 6112)
Jane Iredale旺角彌敦道 580 G-K號彌敦中心 603室(2626 9271)
Naris Up尖沙咀海港城 city'super(2375 8222)

更多 Ketchuper 文章