香港
台灣
北美

使過萬測試  50 Must Buy Apps

周刊Geek友講場 

根據 Apple官方數字,截至 9月為止, App Store上的總 App數量為 25萬個以上,當中有免費有收費,免費 app大家可以盡情試,唔啱用最多 delete佢;收費就唔同講法,唔付款試過又點知係龍定蟲?
雖然部分收費 app都有免費試用版,試過先去買,但用落又係咪真係咁正呢?今次《 Ketchup》就豪花過萬,真金白銀買過百個收費 app,試過好用好玩先推介給大家,所有 app都依照 3大方向:遊戲、攝影及實用埋手,得出呢 50個買咗唔會嘥錢嘅 app,信我哋去買,包冇投訴,好過你使咗一筆先知係廢!

鬥力!考你打機能力

Steve Jobs從上年起已經強調 iPhone(或 iPod Touch)係一部最強的手提遊戲機,果其然, NDS遊戲愈出愈渣, PSP又受翻版影響,搭一轉港鐵,從前一人一手 NDS、 PSP之景已逝,個個都係打 iPhone games,所以呢 2頁會講些非常 gamer向的遊戲。
最勁係原來 iPhone配合 iPad都可以擦出新火花,打後 4頁各有 1隻 iPad+iPhone的組合 game,全部唔平,單係試呢類 game,已經成嚿水美金!

01. iPhone係鏢 iPad係靶
KL Darts+KL Dartboard  US$3.99

近月飛鏢大熱,間間酒吧都有日本電子飛鏢機,個個蒲友都係鏢手。 App Store亦有十幾款飛鏢遊戲,但以 KL呢組飛鏢系列最 pro.。原來佢係 2款 app合一去玩,先用 iPad下載 KL Dartboard(鏢靶, US$3.99),再用 iPhone下載 KL Darts(飛鏢, free),之後 iPad同 iPhone一齊開 app,經藍牙連接後,其中一人手拎 iPhone,模擬掟出飛鏢,咁支飛鏢就會「插」落 iPad的鏢靶上。
家陣個個女仔都有 iPhone,做男嘅隨身帶部 iPad,自己畀錢買 KL Dartboard,然後識女仔嗰陣叫對方下載免費 KL Darts,之後一齊玩,肯定溝死女!
玩法係離鏢靶 3米距離去掟,紅心離地 1.73米,小心唔好大力得滯連 iPhone都掟咗落地,否則喊都無謂。




目前只有一種飛鏢遊戲 Standard Cricket,必須向鏢靶的 20、 19、 18、 17、 16、 15及紅心去掟。


每支鏢的外形非常普通,免費就係咁,除非你肯畀多 US$0.99下載 KL Darts Pro.,支鏢就多花臣好多,但無謂買!


KL Dartboard最多支援接駁 2部 iPhone,可以雙打掟飛鏢。啟動過程會幫你自動開藍牙同認機,非常方便。


每支掟 3次飛鏢, iPhone畫面上會顯示,當你「掟」出時,飛鏢亦會飛出,掟中鏢靶會發出沉實木板聲,掟失會有打爛玻璃聲,好逼真!

02.生果千人斬
Fruit Ninja  US$0.99

生果從畫面底下彈出,用手指當刀,揮指斬生果。生果愈出愈多愈快,有時會彈出炸彈,一斬即 game over, leadboard上最高紀錄係十幾萬,我玩到 235分已經威盡全公司,你話係咪會迷!
揮刀範圍過大,雖可斬更多生果,但更容易誤觸炸彈。


03.獨家關卡
Sonic The Hedgehog 4  US$7.99

如果只係將 console game移植落 iPhone就收你美金$8,我就真係唔建議你買。不過,呢隻 Sonic 4又真係有 2關全新製作關卡,至少叫買得抵,而最最最緊要係玩得順同唔窒,咁先買得順氣。
Sonic係隻強調速度感的遊戲,玩得叻的秘訣係眼明手快!


04.超難玩經典
R Type  US$1.99

80年代經典超難玩飛機射擊 game,我作為 80前可以話你知,移植落 iPhone一樣咁難玩,機身龐大子彈密集,最重要係 iPhone式觸屏操縱桿一樣唔易用,結果令隻 game難上加難。
畫質依然 80年代,但好玩唔怕畫面爛,照舊大量輔助武器及巨型異獸。


05.威水喪屍
Plants Vs. Zombies  US$2.99

玩法係種植物打喪屍,關鍵在於要計種籽數目及植物成長度去射死喪屍,之後儲錢買新植物再殺過,玩落又係停唔到手。
喪屍可愛多過恐怖,細蚊仔玩唔怕會發惡夢。


06.自己做隻 game
Game Dev Story  US$3.99

玩家需要諗計壯大遊戲公司,玩落特別有投入感。呢類 RPG最適合得閒就開 app搞搞間 game公司,目標係成為 game展中最受歡迎公司,夠特別。
畫面格局似 facebook game,無謂咁高要求,最緊要故事性夠強已經可以。


07.好玩過原裝
Mirror's Edge  US$4.99

上年已經推出 PS3版,唔係特別 hit,一移植落 iPhone,居然成為 10大 paid app。因為遊戲簡單,一味跑同跳,用速度制敵,呢類遊戲注定同 iPhone比較夾。
畫質同 PS3差唔多,即係 PS3角度睇係渣,但放落 iPhone剛剛好。


08.勁歌熱按
Lady Gaga Revenge  US$4.99

掛上 Lady Gaga之名就梗係全部都玩 Gaga姐啲歌, US$4.99有 14首歌都可謂抵到爆,去 iTunes Store買都唔只呢個價。
畫面唔算特別,特別在啲歌。


09.罕有出續集
Cartoon Wars 2: Heros  US$0.99

App Store上比較少見出續集的遊戲,玩家主要守城堡,以防敵軍破壞,每次都要計算出箭角度保衛城堡,一計錯滿盤皆落索。
開頭敵強己弱,要玩多幾次熟習系統,之後提升裝備。


10.第一身殺屍
Monster Mayhem  US$0.99

以第一身角度從旁殺屍在喪屍衝閘前殺晒佢哋,守住最後一道防線,萬一彈盡就只剩刀仔,認真大鑊。《 BioHazard》,要用腦。
喪屍仔冇乜難度,但當打大佬時,係可以大到畫面淨係見到對腳咁誇張。


鬥智!最緊要反應快

iPhone、 iPad覆蓋層面極廣,遊戲下下都係 gamer向,非 gamer點算?所以有唔少 app developer都傾向造啲用腦去玩的遊戲,至少吸引到一批非 gamer日以繼夜狂煲。
呢 2頁遊戲冇血腥冇暴力更加冇喪屍,有的只係想你轉吓個腦去諗各種過關方法!

11. iPhone賽車 iPad跑道
PadRacer  US$4.99

除了飛鏢, iPad+iPhone互動又有呢個遙控賽車 game,先用 iPad購買賽道,然後用 iPhone免費買遙控車,最多 4個人一齊在 iPad上飛馳。但係咁都未算好玩,最抵死係賽道可以伸延,將 2部裝了 PadRacer的 iPad拍埋一齊,仲可以擴大賽道畫面(最多支援 2部 iPad連接),勁抵死!



賽道唔算難玩,勝在一齊分享的滋味。


賽車亦唔係特別勁的設計,非常普通的舊式跑車,用模擬操控桿加速,擺動機身轉向。


將 2部 iPad合併擴大跑道,唔使買 2次, sync落電腦後再過落另一部 iPad即可。

12.空對地作戰
Chopper 2  US$4.99

呢隻 game在 iPad或 iPhone上都可獨立玩,利用 motion sensor操控直升機升降及航行,然後進行軍事空對地攻擊,殺敵或救俘虜,但當進行 iPad+iPhone連接, iPhone就會直接變成直升機控制器,雙眼望實 iPad去玩,係另一種兩者連接的特殊體驗。


畫面唔算特別精緻,但充分利用 motion sensor的原理就令玩落似直升機。


將 iPad及 iPhone連接後的畫面, iPhone會變成第一身視點,幾特別。

13.砌漢堡包
Stand O'Food  US$2.99

身為漢堡包店店員,盡快為食客製造漢堡包,要記實配料唔好砌錯。升級後要買新醬料同碗碟,令漢堡更美味同生產得更有效率,主要考你夠唔夠眼明手快!
砌煙肉漢堡同芝士漢堡等,要留意食物輸送帶上的材料到來,未到但有客要,即輸!


14.真的憤怒鳥
Angry Birds  US$0.99

很多人唔明佢好玩在邊?用隻丫叉彈隻雀去殺豬,又要整冧障礙物,絕對考腦筋,難怪攻略都出埋,免費下載,叫《 Walkthrough for Angry Birds》。
隻 game成日 update新關,目前已經有 165關,平均三星期加關卡,抵買的!


15.用腦大作戰
Cut The Rope  US$0.99

有粒糖被繩縛住,要切斷啲繩,令粒糖吸晒附近啲星星,再利用附近的道具送入怪獸口內,全程用腦,仲係諗爆嗰隻,包你 IQ上升!
圖中玩法係先切斷 2條繩,再用泵將粒糖吹入怪獸口中。


16.是否太瘋癲?
Where's Wally?  US$0.99

從一幅《清明上河圖》搵出一個人,你話幾咁困難,《 Where's Wally》就係玩考眼力遊戲,從一幅巨圖中搵出遊戲指定的人物及物件,玩 3分鐘,眼矇;玩 10分鐘,頭痛!
幅幅圖都亂過亂葬崗,不過就係咁先有挑戰性!


17.經典方塊
Bejeweled 2+ Blitz  US$2.99

經典方塊遊戲不足致勝,重點係可以將成績 upload上 facebook,同朋友及全世界鬥高分,打機就係咁有競爭先有鬥志先會 keep住不停玩。
想贏,必須心如止水,講就易,做就難囉!


18.藝術音樂
Swingswing Touch  US$1.99

同樣係音樂 game,至少音符唔再係單調的下降,時而旋轉時而跳躍,走法千變萬化,更重要係每以名畫作背景,玩落藝術成分極高!
音樂係古典名曲,背景係名畫,當係上一堂藝術課也值得。


19.最佳原創
Dodge Dot  US$0.99

被譽為史上最佳的 iPhone原創遊戲,將在畫面中游走的彩球帶回四面各自的顏色基地,中途不可誤碰其他彩球,一心急就會瀨嘢!
玩法係 30分鐘內鬥高分,而佢有能耐令你玩足 30分鐘。


20. 2個傻佬在格劍
Star Wars: Lightsaber Duel  US$0.99

只不過將你部 iPhone變成星戰激光劍,揮動 iPhone會發出陣陣劍風聲,最過癮係可以同其他 iPhone藍牙連接,然後格劍。
畫面單調,只係贏 motion sensor帶動的劍聲,但已經令人勁興奮!


21.突破人間極限
0.03 seconds Pro  US$0.99

一般正常人的反應時間係 0.5秒,但經過訓練當然可以做得更快。通過 10個遊戲去考你反應,極限去到 0.03秒神人境界,這時你會發現自己好似一個瘋子般,不停按 iPhone,去追尋仙境!
考反應也講協調,例如幫黃車影快相時,會有藍車突然駛出,一按即輸。


22.價格浮動
Monopoly  US$1.99

玩法不會有大改變,但買前要留意,隻 game成日都會價格變動,波動過股市,最高見過 US$4.99,低位造過 US$0.99,截稿前一刻係 US$1.99!
將一幅咁複雜多變又多道具的實物 board game變成手提隨處玩,其實功不可沒。


全面補強  iPhone相機功能

今年六月,有個 o架佬叫三井正和,身為攝影師嘅佢開咗個影展,入面啲相全部用 iPhone 3GS影,邊個敢話 iPhone影唔到靚相?三井 san話鍾意用 iPhone影相全因多 app幫手,打開 App Store, Photography一項確實係好多選擇,不過免費版功能多數都慘被閹割唔好用,想買影相 app就要睇吓我哋以下嘅推介,包你唔會使多冤枉錢。


23. iPhone移軸鏡
TiltShift Generator  US$0.99

移軸濾鏡喺數碼相機好 hit, TiltShift Generator就係 iPhone嘅移軸 app。佢好似 DC嘅移軸特效咁,靠調校對焦範圍,整 blur畫面上下製造模型。講真,個模型效果唔算太出,不過無礙佢嘅好玩程度,皆因佢可以用 multi-touch任意放大縮小兼移動 blur嘅範圍,淨係角位清其他位矇都得,影人像前清後矇都做到,勁過 DC乜都冇得 set。


Blur嘅範圍可以自由調校,分為直線上下 blur同圓形圓周 blur兩種。


除咗 blur之外,佢仲可以校 lomo暗角同轉色調,功能好全面。


blur前,可以自由移動 blur嘅位置,間條圍住右邊代較右邊唔會 blur。


效果完成後見到左面 blur咗,可以自由校位置任你 blur。

24.拍片合全景
Video Panorama US$1.99

影全景相 Panorama嘅 app都唔少,不過有好多都係要你分開影幾張相再合成,接位一定唔自然。 Video Panorama就用上 3GS同 iPhone4嘅拍片功能,拍完用 video分析相片再合成,似足 Sony DC嘅一掃全景功能,好用!
接位自然,比另一個全景 app《 Panoramatic 360°》好用。


25.古靈精怪合成相
You Gotta See This US$1.99

全景相 app可以畀你一掃全景,呢款《 You Gotta See This》仲勁,打橫打直亂掃一通都識得幫你 key埋做一張相。
按咗快門任意掃就得,最後會識跟番位合成,當然啲位唔會太夾,但出嚟效果幾特別。


26. 3GS都有閃光燈
Camera Flash Pro  US$0.99

Camera Flash Pro就係一個可以幫你 tune光相片亮度嘅相,效果都幾自然, iPhone 4個閃燈太勁有時用 app執仲好睇。
調光後,光度可自由調校,個人覺得 iPhone4個閃燈太勁,唔係黑得太過分用 app校光會多啲。


調光前


27.& 28.麻利亞:平 game密密買

記者覺得 iPhone app咁鬼多,要搵好 app有如大海撈針,商台 DJ麻利亞就話搵 app不求人:「我平時好鍾意上 App Store周圍搵 app,最愛打機同影相 app,試過用 Pandora呢類 check特價 app嘅 app,但係都覺得唔夠自己搵咁好玩。不過我多數都係買$0.99或者$1.99嗰堆 app,近排最愛玩$0.99嘅《 Veggie Samurai》。」


27.麻利亞推介 1:

《 Veggie Samurai》,一個生果切幾刀,勁過《 Fruit Ninja》。 US$0.99


28.推介 2:

《 Tappi Bear》,本地 app,可愛小熊迷你遊戲六合一,女仔啱玩。 US$0.99


29.蠱惑偷拍器
Camera Camflauge  US$0.99

呢款 iPhone偷拍器就可以扮聽電話, detect到周圍聲音就自動偷拍。最抵死係可以 set埋 timer扮有電話響,咁拎起電話聽都冇咁礙眼。不過影相快門聲點都 cut唔走。
個介面好假,按 answer即進入偷拍 mode,睇一眼都覺有鬼,但係勝在可以扮聽電話聽聲自動影相。


30.升級 1,200萬 12.0
Mega Camera+Zoom  US$1.99

12.0 Mega Camera+Zoom話可以將 3GS同 iPhone4嘅相機像素提高至 1,200萬,畀錢試過發覺影出嚟嘅相像素的確啱數,不過影完 save相要成分鐘咁耐。
Save要成分鐘幾咁耐,幾大像素都無用。


31. o架風貼紙相
PriPri MARRON  US$2.99

PriPri MARRON同貼紙相一樣可以加框加公仔加字, bling bling心心皇冠應有盡有,喺 iPhone用手貼公仔方便過貼紙相機慢慢用筆篤,仲可以打中文加字添。
一樣係影完相之後任加圖案,啲公仔 parts都幾日本 feel。


32.超可愛
Baby Photos  US$1.99

iPhone朋友話影相 app唔係用嚟自娛,而係用嚟「把女」。呢款 Baby Photos預設咗好多款組合,小魔鬼、小綿羊、小蜜蜂等等爆可愛, key你愛人個樣上去最 sweet。
一套套襯好晒畀你嘅公仔衫係 Baby Photos最抵讚嘅地方, Key個頭上去搞掂。


33.當奴:買 app睇實用

Donald就話其實自己都好少畀錢買 app,通常都係同事朋友講開至會,好似最近都喺朋友游說之下買咗隻$9.99嘅《街霸 IV》。「家啲 app唔使自己去搵,好多朋友都係人肉 Pandora,一有平 app正 app就會 whatsapp( iPhone上面嘅 sms app)我哋,不過我平時都係少買 game,電台 app又或者書 app夠多,除咗《街霸》,最貴係買過小黑嘅《偽科學鑑證》。」
阿奴推介:《 Radio Australia》,可以聽外國電台之餘,仲可以做埋鬧鐘。( US$0.99)



34.偷拍專用
Cam Corder Pro  US$0.99

Cam Corder Pro特別在有偷拍,開咗之後按錄影掣會變做 lock機畫面,拍夠解鎖就會 save影片。偷拍都係扮講電話最自然,用 lock機畫面最多係呃班 friend唔為意,放低電話拍低佢哋個傻樣。


開咗偷拍 mode,按下快門就會變呢個 lock機畫面,做得幾真,但作用成疑。


水平儀、網格都係基本而實用嘅嘢,拍片 app無乜對手之下佢都算好用

執相簡單過癮 人人識

影相 app好玩,其實執相 app仲好玩。影完一張相,可以用唔同 app逐個逐個 effect加上去,好似襯衫 shopping咁唔啱試到啱。咪以為執相好複雜,以下介紹嘅執相 app用法全部都相當簡單,功能更係千奇百趣, lomo feel大路嘢梗有,換面、合成甚至 走人都得,分分鐘好玩過打機。


35.執走多餘嘢
Touch Retouch  US$0.99

執相其中一個最常用法就係執走多餘嘢,多餘嘅肉、多餘嘅人、多餘嘅背景,用 Photoshop捽吓捽吓捽走晒,張相即刻靚晒。 Touch Retouch係 iPhone嘅神奇捽捽拳,佢醒目到會捽走物件之後會自動用周圍嘅背景「補地」。試過捽走成個人個效果都幾好,影到啲乞人憎嘅人又或者唔想俾人見到你同佢有合照,除咗成張相 delete之外,以後就多咗捽走佢呢個方法啦!


用筆畫低你想執走嘅地方,再按 Go掣就搞掂。


執走多餘物品,個天空當堂靚仔晒。


執走!
今次試吓執走 3呢位出 iPhone畀筆者嘅哥仔。


效果其實都相當好,係左面有個女仔個樣重疊咗,但真係成個人認到退到。

36.眼耳口鼻隨意扭
Face Makeover  US$1.99

睇《鑽石夜總會》見台妹化妝醜女變索女令人驚嘆,如果你冇咁好化妝技術, Face Makeover幫到你。用家先自訂雙眼、鼻哥同嘴唇位置,之後就可以任意放大、縮小兼扭角度,除咗執靚之外,表情都可以幫你執埋,扭一扭個嘴唔笑都變笑,身邊啲人分分鐘就睇到笑喇!


佢預設有一個金髮美女畀你任扭。


扭到面目全非效果都幾自然,用嚟整醜最憎嘅人可能比較實際用啲。

37.萬能執相器
Pictureshow  US$1.99

加 effect嘅 app有如恆河沙數,如果只揀一個嘅話 Pictureshow相信會係最好嘅選擇。加相框、加字、 tune色樣樣皆能,最正係有 27種特效 filter effect,畀一次錢就有齊晒,唔使好似 Histamatic咁逐款鏡頭買。


Pictureshow有好多好玩嘢,介面都比較 pro。


加寶麗來相框、轉色調,加雜訊都做到,有啲 effect更係幾特別,呢個雙重曝光就喺其他 app少見啲。

38.隨機漫畫
Photo Shake  US$1.99

Photo Shake可以將幾張相分格合做一幅,搖一搖部機就會隨機再排過,隨意得嚟唔使自己逐格放。搖完之後再自己加 effect,加對話 bubble同轉色調都冇問題,自製真人漫畫就最好玩。


揀好相再揀相框,佢會幫你自動排好相。


唔滿意, shake一 shake部機會自動排過,隨機啱晒懶人。

39.逐格砌
Diptic  US$1.99

Diptic同 Photoshake一樣可以分格砌相,再排相上去,分別係 Diptic格仔 layout款式比較多,亦可以逐個格加 effect,冇 Photoshake搖機咁花巧,但勝在實用,商台 DJ麻利亞同阿奴都有買佢 o架。


比起《 Photo Shake》,《 Diptic》比較多 layout揀。


逐格將相放好位置之後仲可校 effect,不過就冇得加字整漫畫喇。

40.自製雙面人
iSplit Photo  US$1.99

蝙蝠俠雙面人左右兩邊面唔同樣嚇死人,但係用 iSplit Photo將兩塊臉合成一幅就幾 funny。除咗左右合之外,上下合、打斜合都得,拎個 friend對眼加你個嘴睇吓咩樣就夠好笑。


拍第一張先拎上半部。


之後鏡頭會 keep住睇到上半部,你可以就番個 size影下半部。


完成圖就係咁。

41.改頭換面
iSwap Face  US$1.99

想睇吓有冇夫妻相,用 iSwap Face試吓就一目了然,呢個執相 app可以將兩塊面交換,調校好面形大小同角度,再按一下個 swap掣,兩塊面就會對調,男女任調效果特別搞笑。


先 set好兩塊面嘅位置。


阿 Sa阿嬌左右對調之下發覺阿嬌塊面幾襯阿 Sa,但係阿 Sa塊面就唔太襯阿嬌喇!

42.攝影助手
Photo Buddy  US$1.99

呢款 Photo Buddy唔係影相 app,但就係攝影嘅好幫手,佢提供咗唔同場景嘅測光值畀用家參考,幫你計好光圈、快門、景深等參考數值,最啱玩菲林機用。
其實佢係 iPhone版嘅測光表,用數碼相機的話都唔使用到佢。


43.過相王
Photo Transfer app  US$2.99

想過 iPhone的相落 iPad其實都幾麻煩,唔想經 iTunes可以靠呢個 Photo Transfer App透過 WiFi過相,不過就每個 i-device都要有呢個 app兼喺相同 WiFi網絡之下,即係要畀兩次錢!
過相落電腦亦可,只要電腦同需要嘅 iPhone或者 iPad o係同一個 WiFi網絡就過到。


44.整色整水
Colour Splash  US$1.99

Colour Splash可以畀個空間你發揮創意,佢會先將相變做黑白相,再由你任意恢復任何位置嘅色彩。黑白之中帶點對比,效果幾特別,最重要係可以自己畫,畫得靚一靚實大把人讚你有藝術細胞。


Colour Splash會自動將張相變做黑白相。


將你想有顏色嘅地方掃一掃就會變番彩色,你亦可以加其他顏色落去。

學外語幫讀書 實用 aPP推介

除咗打機同影相,學生可以用 iPhone、 iPad睇 notes,去旅行時又可以帶住學外語 app幫幫手,神奇程度好比多啦 A夢百寶袋!


45.新八模 Suki 微博晒執相

「我平時都有用 iPhone打機,《 Bejewel》同《 Angry Birds》都有畀錢買,不過用得最多嘅一定係影相 app,最愛《 Pictureshow》,好多時都用佢整 o靚啲相先放上微博,最鍾意用佢整菲林 lomo feel,好靚 o架。」
Suki推介:《 Ringtone Maker Pro》,可以喺 iPhone上面製作鈴聲,簡單易用。( US$0.99)



46.學生哥必備
Goodreader  US$1.99

有咗 Good reader你就可以用 USB或 WiFi過唔同格式嘅文件、相片同影片落 iPhone度睇番,最正係佢內建瀏覽器,打網址上網下載檔案,用嚟 download學校啲 notes相當方便,如果唔用佢就咁用 Safari真係唔識 download嘢呀!


內建 browser可以直接喺上面 download file。


iPhone 4嘅視網膜芒睇 word檔幾舒服,係個芒細咗少少,用 iPad睇就 fit。

47.日本人妻發音
不失禮遊日對話器  US$2.99

靈格風雖然收咗檔,但係想快速學曉外語仲有 iPhone幫手。學日文嘅 app唔少,不過 DJ Maria同大家推介《不失禮遊日對話器》,皆因寫 app嗰個係香港人,教材指導同發音示範就係佢個日本人老婆,香港人易明易懂之餘亦保證發音語法準確,記者聽過都覺得把聲唔錯,幾有心機學落去。
Alex Ho本身係插畫家,所以呢個 app有靚畫又有靚聲,學外語都開心啲。


48.估歌仔 app
Sound Hound  US$4.99

有冇聽過心入面響起一首歌,但係諗極都諗唔起佢叫咩名?Sound Hound可以畀你對住哼幾秒,之後佢就可以認到你唱咩歌,記者親身試過國語歌和日文歌都照認到,比較可惜嘅係偏門一啲如謝金燕嘅《嗶嗶嗶》或者尹光嘅《少理阿爸》就認唔到喇。
大熱嘅中文歌,好似陳奕迅咁,基本上都認到,好過其他只認到英文嘅同類 app。


49.最強 App AppAdvice  US$1.99

今期 Ketchup就幫你揀咗咁多款 paid app,第時有新 app點算?其實都有唔少關於 app資訊嘅 app,免費嘅 appshopper同 pandora都算出名,不過最齊全最多更新嘅始終都要數到 AppAdvice。佢分晒類咁推介各種 app,分為 essential必買、 Notable注目等多個等級,好 app一目了然。
最新 app可以喺 app review度搵到,有晒評分同評語。


50.馬路即時資訊
HK快相雷達  US$1.99

HK快相雷達聽個名都知係畀司機大佬睇快相機喺邊嘅 app,入面不時有其他用家提供快相機嘅 GPS位置。除咗快相雷達之外,仲有即時馬路資訊,仲可以校警號,一有新交通消息就會響,開車時開住呢個 app就萬無一失喇。
快相機喺地圖上面 mark住綠色大頭釘,路過要留意車速喇!


更多 Ketchuper 文章