香港
台灣
北美

【被異鄉人妻搞到喊】 再婚想嫁去邊個國家? 38歲陳貝兒:首選始終係港男

即時娛樂 
2017-09-14 18:30:40 HKT

陳貝兒之前到中東拍攝《嫁到這世界最邊端》。


貝兒同11歲嘅Aisha。


佢話當地氣溫高達40幾度。


貝兒、港女Laila及11歲囡囡Aisha。(右起)



失婚陳貝兒主持大台節目《嫁到這世界邊端》都踏入尾聲,今明兩晚嘅內容就係講到42歲港女Laila嫁到中東嘅故事。本身從事珠寶生意嘅Laila,有次佢到杜拜參展時而認識咗老公Assad,千里姻緣一線牽,Laila就喺中東落地生根,仲生埋女,囡囡Aisha今年都已經11歲喇!

之前到中東拍外景時,貝兒話喺當地留咗4日,最唔適應係當地嘅48度高溫,貝兒仲要學當地信奉伊斯蘭教嘅婦女一樣穿黑袍,佢真係熱到叫苦連天,試過差點中暑,貝兒今日回覆傳媒時話:「拍外景時熱到暈,要立即休息狂灌水。我有問異鄉人妻Laila點樣散熱,佢話啱啱嫁去都唔適應,住落咗一段時間先過度到,佢話食印度冬瓜同飲涼茶,外面40幾度,室溫有冷氣都20幾度,所以好易感冒。」有傳佢哋喺當地拍攝時,曾收到陌生女穆斯林恐嚇一事,貝兒話:「誤會一場,冇事,伊斯蘭教徒其實好友善。」

回復單身嘅貝兒走勻世界邊端,有德國、丹麥、曼谷同中東等訪問異鄉人妻,佢都被幾位異鄉人妻真人真事感動變喊包,要佢揀嫁到世界邊端時,又揀邊一個國家呢?貝兒話:「腦閉塞,考起我。」佢諗咗成分鐘先答:「首選都係港男,我始終香港土生土長,唔想離開,不過緣份要嚟,可能擋都擋唔住。」