香港
台灣
北美

【「多Like唔會令你贏」】預言Celine會輸 秋生:腹語妹妹係外星人

即時娛樂 
2017-09-14 16:49:02 HKT

Celine妹妹譚芷昀由6月中參加《全美一叮》開始,唔少港人會留意呢位「香港小巨肺」參賽嘅表演。雖然最終落敗無緣晉級,但無疑Celine喺呢個比賽中,刷新咗多項紀錄,當中包括史上首位華人獲Golden Buzzer榮譽(新聞連結: http://bit.ly/2hqqlcn )。

Celine未能再下一城入圍決賽,有人歸根咎底,覺得佢揀錯歌,但更多嘅人,就認為佢對手太強。

今日早上,大會未宣佈賽果前,黃秋生亦有喺FB講Celine妹妹,估唔到秋生原來一直有留意佢嘅演出。秋生指出Celine今次(準決賽)揀唱動畫《魔海奇緣》主題曲《How Far I'll Go》,其實唱得好好,亦冇刻意賣弄高、長音,但秋生認為今次比賽,Celine對住「腹語女」Darci Lynne同「小雲妮」Angelica Hale,肯定唔會贏。

秋生話覺得Celine唱得好好,唱到好似講嘢咁,音樂劇歌曲根本就係要唱到好似同人講嘢咁,同埋佢今次又冇賣弄高、長音。「係人聲嚟。等我睇埋個肥妹仔先……睇咗肥妹仔同腹語妹妹,冇啦,Celine唔會贏。因為其他兩個都唔係人咁品,係外星人。個肥妹仔把聲好似人工智能咁,鍾意點就點,而且自由奔放,美國特色;腹語嗰個仲勁,笑笑口都唱得咁好,外星人!外星人!冇啦!希望Celine 將來可以繼續喺歌唱藝術中進修,唔好浪費咁好天份,畢竟全美一叮唔係全世界一叮。ps 多like係唔會令你攞到冠軍嘅,即係攞住大富翁啲玩具錢唔會買到樓一樣囉。」

秋生話如果Celine係架法拉利,肥妹係架噴射機。要比喜好冇得比,要比速度就仲差幾皮。



秋生今朝喺未有全美一叮賽果前,已預言Celine唔會贏。(資料圖片)


秋生有讚Celine今次嘅表現。(資料圖片)


亦話Celine今次冇刻意拉高同長音。(資料圖片)


只可惜腹語妹妹實在太強。(資料圖片)


仲有小雲妮都好犀利,秋生形容佢哋兩個係外星人。(資料圖片)


兩位外星人都順利入到決賽,到時就要正面交鋒。(資料圖片)

相關新聞