香港
台灣
北美

【百忍成金】女友張寶兒係虔誠基督徒 36歲袁偉豪要禁慾?

即時娛樂 
2017-09-14 13:23:40 HKT

(資料圖片)


袁偉豪回覆周刊話親密有好多種,自己亦會尊重女友。(資料圖片)


張寶兒係虔誠基督徒,婚前要守身如玉。(資料圖片)

今年36歲嘅袁偉豪,同舊愛岑杏賢甩拖冇耐,早排赴非洲拍大台節目《打工捱世界II》時,撻着同行嘅25歲前港姐張寶兒。

節目完咗返港後,袁偉豪就自爆曾經諗過縮沙,放棄呢段啱啱萌芽嘅戀情,事關一嚟袁突然考慮要顧及岑杏賢嘅感受,二嚟亦驚覺張寶兒家底猛料,驚自己襯佢唔起。不過send短訊話做番朋友唔夠24小時,袁偉豪又改變主意,認為真愛難尋,要好好珍惜女方。(新聞連結: http://bit.ly/2erMu68 )

雖然身家、年紀都有啲距離,不過似乎無阻袁偉豪同張寶兒戀情升溫,出親活動講起對方都會甜絲絲。但今日有周刊指,阻隔二人嘅,原來係宗教禁慾問題。報道指張寶兒本身係虔誠基督教徒,性慾方面好堅持,之但係袁偉豪並非信徒又正值血氣方剛嘅年紀,要禁慾都有啲難度。對於信仰同禁慾問題,張寶兒事後就回覆周刊話自己知自己底線,唔會亂嚟,而佢亦信男友會令自己好放心。至於袁偉豪,就話親密有好多種,亦會尊重女友。