香港
台灣
北美

【向黃爸爸致敬】 翠如BB同蕭正楠去魚檔影破格婚紗相?

即時娛樂 
2017-09-14 13:06:32 HKT

【新增回應】

黃翠如由有線轉投無綫後,榮升做當家花旦,除咗事業得意,仲贏到愛情,佢同蕭正楠拍攝劇集《師奶Madam》撻着,拍拖三年,愛得越來越高調,一啲都唔避忌,近日仲不時傳出婚訊,今日就有周刊報道話佢哋嘅婚期已經訂咗明年年中,翠如BB為咗向好辛苦養家嘅爸爸致敬,仲好有心思咁打算去魚檔影婚紗相。

翠如BB同蕭正楠拍拖三年,感情一直好好,今年五月就有《蘋果》讀者,喺澳洲野生捕獲到佢哋出埠拍拖拖(新聞連結: http://bit.ly/2x1QdzA ),三個月後,再有《蘋果》讀者喺英國遇到佢哋,有指佢哋係去英國睇景準備結婚喎!(新聞連結: http://bit.ly/2vNswdQ )

咁今日就有周刊嘅報道話,其實佢哋因為今年太忙,所以婚期並係之前傳嘅今年,而係明年年中喎!報道入面嘅知情人士話,蕭公子同翠如呢幾個月都有好多工作,翠如BB就要宣傳佢有份主演嘅劇集《使徒行者2》,而蕭公子就要同鄭裕玲飛去歐洲拍《Do姐再Shopping》,根本冇時間搞婚禮。知情人士仲話因為蕭公子係獨子,翠如BB屋企又做生意,所以定會大搞婚禮。

另外,報道又講到翠如BB一向都好愛錫家庭,而佢嘅爸爸黃永華,現為土木工程公司聯旺集團(8217)股東同行政總裁,但原來黃父當年為咗養家,曾經喺九龍灣街市賣魚,報道就話翠如BB將會同蕭公子去魚檔影婚紗,目的就係向黃爸爸致敬。

黃翠如今晚喺中環出席服裝品牌的時裝表演,翠如一出現就俾在場記者恭喜,佢笑笑口話:「多謝大家,傳過好多次,封面好sweet,傳結婚都好過傳分手或者鬧交。」翠如話所講嘅事情都未有構思:「喺魚檔影未有計劃,要問爸爸借邊檔。成日問呢啲問題我都好尷尬,女仔嘅人生有好多唔同時光,唔應該淨係講結婚,大家睇得多都會悶,不過報料人好有心,好熟悉屋企。」


有報道話翠如BB構思同蕭公子到魚檔影婚紗相。(資料圖片)


(資料圖片)


佢哋不時會情侶檔搵銀。(資料圖片)


(資料圖片)


(資料圖片)


(資料圖片)


翠如BB想向爸爸致敬,所以打算去魚檔影婚紗。(資料圖片)


翠如話未有呢個計劃!(攝影:沈健程)(蘋果日報)


翠如話成日俾人問結婚呢個問題,搞到佢好尷尬!(攝影:沈健程)(蘋果日報)