香港
台灣
北美

【鬥口響】英超強豪搶出閘

即時體育 
2017-09-14 02:30:41 HKT

英超偽強隊年年都有,即係季前聲大大,季中冇貨賣嗰種,上季就係曼聯同曼城,季初摩連奴同哥迪奧拿空降殺聲震天,點知季中已經脫離爭標行列。

今季去到第四輪,利物浦作客被曼城炒五球,場波嘅賽果去到咁懸殊,沙迪奧文尼領紅令紅軍大半場打少個,令高路普提早舉白旗當然重要,不過紅軍最嚴重問題都係雙閘阿歷山大阿諾特同艾拔圖摩蘭奴,防守完全唔夠班。

就算雙方打緊11人時,曼城已經成功靠好多快速嘅地面傳送,打穿晒紅軍嘅肋部(half space)防守,同埋紅軍冇針對性斷絕曼城中後場對雙核奇雲迪布尼同埋大衛施華嘅輸送,賴以維生嘅前場緊迫亦都打唔出威力,咁就令到呢兩位進攻中場如入無人之境。

另外,曼聯作客俾史篤城逼和2:2,都可能有啲指標性。紅魔頭三場如拾草芥,不過三支手下敗將,李斯特城、韋斯咸同史雲斯,家吓都係得三至四分,尤其係後兩隊,睇嚟今季護級都要預埋,一對硬淨嘅史篤城,盧卡古就有啲被孤立,不過佢始終都係紅魔最有威脅嘅球員。

愛華頓處境就更差,大事擴軍後接連輸畀車路士同熱刺,嗰邊季初希望大幅改革水晶宮嘅法蘭迪保亞已經落鑊,心中同樣有好多想一蹴而就藍圖嘅荷蘭人朗奴高文,未來會唔會有同樣下場?

文:飛鴻

相關新聞