香港
台灣
北美

【借醉向阿佘示愛】無綫綠葉王戴耀明與圈外女友分手:童話係劇集先至有

即時娛樂 
2017-09-14 00:31:10 HKT

無綫綠葉王戴耀明,原來係有女朋友……曾經;而且,佢心目中仲有一個女神——佘詩曼。

03年,戴耀明同阿佘拍完《金枝慾孽》做咗好朋友,佢試過同阿佘講,話將來搵到錢要娶佢做老婆,又試過飲醉酒send短訊示愛話好掛住佢,不過戴耀明話預咗阿佘請食檸檬,希望將來可以有機會同佢拍戲有感情線,當係一個回憶。

至於目前嘅感情狀況,報道話戴耀明同拍拖5年嘅女友喺年初分手,雖然大家有啲懸殊,不過佢都好努力去賺錢,希望可以拉近距離,但係最後都冇結果。

戴耀明今日接受傳媒訪問時,哈哈大笑話:「我哋係好朋友,成日同埋阿戚(戚其義)成大班演員聚會,呢啲係講笑嘅說話,我哋嘅距離係10萬億咁遠,望吓就夠!」佢仲話:「不過阿佘真係好正,有時比男人仲男人,但係有時佢又好女人,性格又爽直,佢真係數一數二嘅珍品,難得一班朋友咁玩得,真係好難得!」

不過感情方面就似乎冇咁順利,好似佢同拍拖5年嘅圈外女友分手,戴耀明話:「其實分咗手都有一段時間,心情都已經平伏晒,童話故事只會喺劇集裡出現,兩個人相處,唔係淨係話好鍾意就得,有時位置太遠,一定會有好大壓力。」

「感情嘅嘢,都係等上天安排,係時候就自然會出現,冇得強求,順其自然喇!」



戴耀明話:「阿佘真係好正,有時比男人仲男人,但係有時佢又好女人,性格又爽直,佢真係數一數二嘅珍品,」(蘋果日報)


與圈外女友拍拖五年,分手收場,戴稱:「童話故事只會喺劇集裡出現。」(蘋果日報)

相關新聞