香港
台灣
北美

【動L綠葉王】無綫「御用傻仔」戴耀明大陸做男一 齋企扮佈景都收三萬一組

即時娛樂 
2017-09-14 00:30:22 HKT

無綫資深演員廖麗麗,一生經歷充滿傳奇,由國共內戰、中共建國、父親在三反五反無辜被屈批鬥下獄,以至抄家;然後文革來了,廖麗麗變成紅衛兵,結果愛上印尼華僑。之後廖麗麗還遭領導強迫墮胎……

但很多觀眾,要等到廖麗麗離世時,才知道這位對舞蹈家出身、且對演藝行業貢獻了逾三十載的前輩真正名字。

入行二十五年戴耀明,都係觀眾一睇到樣,就認得他。但名字呢——或者真係記唔住,但你總會記得佢曾經喺《EU超時任務》不慎「動L」———戴耀明嗰陣都有喺社交網多謝大家對佢「小戴」嘅關注。

查實,戴耀明喺大台有「御用傻仔」之稱,扮乜似乜,今年佢終於唔使要喺大台「扮傻」,而係北上大陸,擔正做《爆裂老婆三歲夫》嘅男一,出入有保姆車兼私人助手照顧,獲尊稱為「戴老師」,唔少網民都戥佢開心!

今日有周刊報道,戴耀明喺呢25年演戲生涯,都試過意志消沉,好彩嗰陣有林保怡鼓勵。戴耀明話,林保怡嗰陣同佢講,「小明,你呢啲唔係『男一』嘅樣,但你個樣,遇上套劇需要呢啲特質時,你就有機會做主角。」

刻下忙緊拍劇嘅戴耀明,今日接受傳媒訪問,講到佢喺大陸劇擔正做男一,唔知佢會唔會索性北上發展?佢話:「其實真係好好彩,好多謝大家俾呢個機會,我o依家都未有確實計劃,我同公司仲有合約,而且喺大陸又冇經理人,係自由身,所以諗住邊拍邊學,慢慢再決定!」即係大家仲可以喺大台劇集見到佢。

o依家戴耀明拍緊劇集,預計11月會返大陸拍劇:「今次會同曹查理合作拍一套時裝劇。」

之前有報道話戴耀明今次喺大陸拍劇酬勞可觀,拍一組戲已經等於喺香港兩、三個月人工,佢就話:「始終上面有好多電視台,唔係好似香港得一間,變咗需求自然大,喺綠葉演員嚟講,我已經算平,好似同一個級數,出得嚟認得個樣,起碼有四、五萬一組,就算嗰啲企喺皇帝身邊嘅太監,都有兩、三萬一組,我只係中位價。」

不過戴耀明話:「雖然我喺香港拍劇人工唔高,亦唔係成日爆騷,但係如果佢哋冇睇我啲劇,又點會識得我呀?又點會搵我拍劇呀?所以公司都幫咗我好多。」



睇個樣勁熟面口,但講得出佢叫咩名嗎?佢係戴耀明。


雖然戴耀明唔係走靚仔路線,但佢的確扮乜似乜。


戴耀明就快返大陸拍劇,仲會擔正。



佢話喺大陸冇經理人,自由身,邊做邊學。


儘管有機坐正,但佢都冇忘本,仲話唔係喺大台拍得劇多,根本冇咁多人認得自己。




戴耀明話自己只係收中位價

相關新聞