香港
台灣
北美

【歐霸盃】奧燒藍斯掛免戰牌 邊個復出正選鬥科隆?

即時體育 
2017-09-13 23:30:24 HKT


基奧特


韋舒亞


阿歷斯山齊士

歐霸盃分組賽周四開打,但阿仙奴就一如所料,唔會出強陣打呢個盃,領隊雲格證實奧斯爾同艾朗藍斯兩人,都唔會喺H組首輪對科隆場波上陣。

一嚟周日英超要大戰車路士,二嚟奧斯爾同藍斯早前國際賽周都踢咗兩場比賽,所以雲格想佢兩個休息,唔使踢今周歐霸盃。另外,教授亦證實防中高基連因腿筋傷患要唞三周,一樣無緣鬥科隆。

除咗以上三位,上屆歐聯對拜仁慕尼黑領紅牌嘅哥斯尼會停賽,加上韋碧克、格列沙加、拿卡錫迪同門將施治,亦同樣缺席周三嘅集訓,好大機會都唔會喺周四場波上陣。相反,今季再被兵工廠收回己用嘅韋舒亞,已經復操,而雲格亦強調佢喺練習時狀態唔錯,尤其中場冇咗藍斯、沙加同高基連嘅情況下,佢分分鐘呢場踢正選。另外,阿歷斯山齊士、基奧特同禾確特,應該會係雲格呢場起用嘅進攻三叉戟。