香港
台灣
北美

【男友支持】落力排舞準備紅館開騷 JW話會再邀請黎明做嘉賓

即時娛樂 
2017-09-13 21:22:08 HKT

(攝影:馬建華)


王灝兒(JW)今日嚟到商台為明年一月初紅館演唱會作宣傳。(蘋果日報)


JW今次開騷除咗獲男友體貼支持,男友父母亦表示會支持。(蘋果日報)


上次演唱會請唔到舊老闆黎明任嘉賓,佢話今次會再邀請。(蘋果日報)

王灝兒(JW)今日嚟到商台為明年一月初紅館演唱會作宣傳,佢透露已落實演唱會名叫《Never too early》,仲話覺得今次紅館機會係上天畀自己最好禮物添!這些機會,陳曉東都等唔到…

上次JW喺Star Hall舉行嘅演唱會安排咗廿多位舞蹈員伴舞,今次JW決定唔用太多舞蹈員,想將焦點集中自己身上,佢話:「我已經開始排舞,用三個月時間去排,我諗過想著波鞋或赤腳咁跳,咁先可以展示自己活力,不過未同公司講。」跳舞導師指好大機會雙腳起水泡,問到男友會否見佢攰而主動按摩?佢話:「有時我哋肩膊攰,都會互相按下肩膊,又會一齊出去按腳。」

JW今次開騷除咗獲男友體貼支持,男友父母亦表示會支持,佢話:「Uncle Auntie好支持我,好鍾意我嘅音樂,o依家同公司傾緊點合作,之前佢哋已經支持江若琳個騷,所以佢哋好支持香港樂壇。」搞掂紅館騷後,之後係咪會出嫁?佢甜笑話:「未呀,暫時專心紅館,嚟緊希望有機會到廣州、清遠同佛山同Fans見面。」上次演唱會請唔到舊老闆黎明任嘉賓,佢話:「會再邀請,始終係佢帶我入行,係恩師,如果做唔到嘉賓都想邀請佢嚟睇。」