香港
台灣
北美

【李八方online】唔識英文累到西環契仔?搓胸勤:躺著也中槍!

即時要聞 
2017-09-13 21:06:46 HKT

撇開聯署事件誰是誰非?八方都想知,陳克勤其實知唔知「I'll pass」點解?蘋果日報

校園內嘅港獨標語事件,竟然惹嚟一個花生小枝節。話說39位建制派議員日前向教育局長楊潤雄發聯署信,反對校園播「獨」,要求當局跟進。本來呢啲政治姿態例牌菜,建制派全面歸隊都好正常,但前晚政圈突然離奇傳出風聲,話西環契仔謝偉俊唔想簽,卻因為民建聯陳克勤唔識英文而「被簽名」,鬧出一場建制小風波。

謝偉俊噚日話喎,覺得呢個問題應該由學校自己討論,外界包括政府唔需要畀壓力院校,所以覺得聯署「唔出好過出」,咁咪回覆負責聯署嘅建制派副班長陳克勤話「I'll pass」囉!佢話可能溝通上有誤會,「佢以為pass係等於通過咁解」,當咗佢同意而加埋佢個名!

謝偉俊仲教大家英文,話「I'll pass」通常係解做好無奈地唔想參加,同時話唔會批評人喎,冇諗住追究,一人少一句似乎更好。

由於陳克勤有搓my breast前科,似乎真係似佢唔識英文搞出來嘅風波。但建制派卻有人放風為克勤伸冤,叫大家諗諗呢壇聯署背後邊個牽頭,西風狂吹下建制派點敢唔簽?會唔會有人見勢色唔對想搵啲下台階?陳克勤就喺Facebook發文,自稱「躺着也中槍。經一事,長一智。」,強調「建制派很應該團結一致」。之後hashtag「班長唔易做」、「太傻太天真?」,唔通暗示啞子吃黃連?