香港
台灣
北美

【亞視藝人做老闆(2)】學攝影考潛水牌狂增值 楊正軍:做演員唔實在

即時娛樂 
2017-09-14 12:00:17 HKT

加入亞視5年多,楊正軍大多數時間都係喺度等──等公司安排工作,難怪佢話:「一個咁飄忽嘅環境,自己其實有啲驚。」亦係因為咁,佢由嗰時開始學潛水,一學就上癮嘅正軍,依家更轉型成為一個潛水教練兼海底攝影師。

記者:倩宜 攝影:馮峰、Neo

楊正軍,2011年參加舞蹈比賽節目《亞洲星光大道 4 跳舞吧!》加入亞視,由最初被委派做唔同綜藝節目主持,到最後靜待公司派工作通告,正軍坦言過程唔好受:「藝人好多時都係受人擺佈多,由其你係亞視做嘅嘢就係等通告,一個咁飄忽嘅環境,或者對於自己人生咁飄忽,其實有啲驚,不過你話係咪唔好呢,我又無話唔好嘅,只係我鍾意實在啲,所以喺亞視冇晒嘢做嗰時,我咪走去學潛水囉。」

最初係應朋友邀請而去學潛水,點知正軍就一潛愛上,最後仲考埋個教練牌做埋潛水教練。喺亞視熜機之後,正軍就飛咗去菲律賓住咗半年,兼且開始佢嘅潛水事業:「係當地做咗半年潛水教練,期間有做下海底攝影,返香港之後就開始接下啲海底攝影工作做,工作以廣告同旅遊節目拍攝為主,空餘時間都會教潛水。」

講到潛水教練呢份工,正軍話有唔少有趣事可以分享:「例如有個學生跳咗落水之後,都未潛落海底,佢已經係水度面爭扎話好驚唔學喇。有次有個學生,我喺水底叫佢除咗個mask,點知佢就連口入面要呼吸嗰舊嘢都吐埋出嚟,我望住個學生真係呆咗。」

正軍話自己依家好享受海底攝影嘅工作,問到佢會唔會再返幕前?佢話:「唔會強求,係依家呢個時候,我會答你我想做一個出色嘅教練同出色嘅海底攝影師多啲。」



楊正軍現時已較少在幕前演出。(蘋果日報)


現時是reelancer的正軍,主要是做海底攝影的工作,閒時亦會做潛水教練。(蘋果日報)


日前他跟其學生Tina進行潛水訓練。(蘋果日報)


二人在泳池邊準備落水。(蘋果日報)


正軍做出「Down」的手勢,示意Tina開始下潛。(蘋果日報)


近日天氣炎熱,正軍表示於水中比在地上舒服得多。(蘋果日報)


在海底自拍對正軍來說毫無難度。(蘋果日報)


穿上鯊魚網潛水衣的正軍,在海底教授學生潛水技巧。(蘋果日報)


當年在亞視工作的藝員證。(互聯網)


楊正軍當年是參加亞視舞蹈比賽節目《亞洲星光大道 4 跳舞吧!》而入行。

相關新聞