香港
台灣
北美

【李八方online】屯門醫院為病友首辦音樂會

即時要聞 
2017-08-13 15:55:11 HKT

劉柏照(左)喺醫護人員鼓勵下重拾對琵琶嘅熱愛,並舉辦小型演奏會。政府新聞處圖片

嘈嘈切切錯雜彈,大珠小珠落玉盤。屯門醫院嘅活動室傳來陣陣琵琶聲,68歲嘅琵琶高手劉柏照喺小型音樂會,向逾50位家人、朋友同院友,分享對音樂嘅熱愛。

劉柏照師承琵琶大師林風,曾經喺公開比賽兩度奪冠,後來為咗事業放棄音樂。年幾前確診前列腺癌四期,當時情緒較低落,屯門醫院資深護師黃莉明接受政府新聞網訪問,憶述當初接觸劉柏照,對方受病情困擾,心緒不寧,後嚟知道佢熱愛琵琶,靈機一觸,決定為佢搞琵琶演奏會,結果促成屯門醫院首次為病人籌辦嘅音樂會;由安排場地到印製場刊,都係臨床腫瘤科紓緩及寧養服務團隊義務幫忙。

屯門醫院臨床腫瘤科副顧問醫生吳雲英話,癌症患者接受紓緩治療時培養個人嗜好,有好大裨益;圓咗演奏夢嘅劉柏照就話呢次演奏會,令佢覺得「人間有情,世界有愛」。