香港
台灣
北美

【跨境酷刑】曾鈺成冀盡快查出真相:唔明點解因一張相做出咁大動作

即時要聞 
2017-08-12 19:29:26 HKT

前立法會主席曾鈺成出席一個論壇後被問到民主黨成員林子健遇襲案,他指由執法部門徹查事件是唯一途徑,不論是何人所為,「香港發生咁嘅事一定係犯法嘅」,警方有責任找出兇徒繩之於法,他指未查明真相前各方都會作很多猜測,他自己亦沒法知道真相如何。被追問會否影響一地兩檢的討論,他認為即使有影響亦無可避免,因此愈快查出真相愈好。

對於林子健稱擄走他的幾名操普通話口音男子曾警告他不要將球星美斯的親筆簽名送給已故諾貝爾和平獎得主劉曉波的遺孀劉霞,一張球星簽名是否真的對北京造成如此大的壓力,曾鈺成稱不清楚,「我會覺得好奇怪,香港一啲政治人物、有啲公眾人物用更強烈嘅語言,更加明確嘅行為去表示支持劉曉波、劉霞嘅大有人在,點解會特別針對一張相就做咁大動作呢?呢件事本身我覺得好難理解,但我亦都唔會去質疑林先生唔係真係經歷過一個咁痛苦嘅經歷,所以一定要查出真相。」

曾鈺成曾講過想不到任何不違反《基本法》就能實施高鐵一地兩檢,如今政府拋出在西九高鐵站劃地給內地部門實施內地法律,他認為爭議已成為香港人不信中央政府及特區政府的問題,「呢個問題對我嚟講係不存在,因為我對中央政府同特區政府係充份相信,我亦相信政府嘅講法」

但曾認同民主黨創黨主席李柱銘所言《基本法》20條的立法原意不是這樣引用在一地兩檢方案上「20條嘅原意唔可能話中央授權畀特區政府放棄佢權利,我認為好簡單,條文亦好清晰,如果話一地兩檢同20條關係,係授權特區政府放棄行使權力,唔可能係對基本法條文嘅正確理解,但提出20條嘅人士有冇其他解釋,咁就係另一個問題。」至於是否政府理解出錯,他說尚未聽過有任何人對20條有新解釋,包括內地法律人士,但他不能斷章取義去評論律政司司長袁國強在內的官員說法,因為對方有全套說法,認為可讓法律專家再進行討論。

同場的民主黨創黨主席李柱銘稱收到林子健通知其遭遇時,他最擔心其傷勢。他透露林周五早上8點致電給他,對方稱希望開記招時可保留傷勢,故食了止痛藥召開記者會,他與支聯會主席何俊仁都認為事件應該公開,「呢啲人(強力部門)係咪真係等於國家嘅人,我哋真係唔知,講普通話講得流利,內地嚟嘅人夠得㗎,同埋如果係『強力部門』都有不同,有屬軍隊,有屬黨,邊個指使並唔知道。係咪真係『強力部門』我哋唔知,如果係,喺邊度更加唔知,依家唔可以好肯定咁講。」

被追問事件中很多表面證據都已經失去,例如林已將當時身穿的衣服洗掉,會否令事件不了了之。李稱最初不知道林未有保留事發時的衣物,「因為佢冇法律常識,冇從呢個角度去睇,打落去嘅釘都頂得順,要保留證據,反而咁容易保留嘅衫唔保留呢?可以話係好愚蠢嘅做法,喺法律角度,如果喺差人查案角度係好奇怪,冇理由咁做,但佢當時已懞查查。」他說不知道警方翻查了多少閉路電視片段,除非看到林登上地鐵或小巴證明林講大話,否則都應繼續追查,不能因為鏡頭看不到其他人就不去追查事件。


曾鈺成稱林子健事件未查明前各方都會作很多猜測,希望當局盡快查明真相。(王心義攝)(蘋果日報)


李柱銘稱事前不知道林子健並無保留當時的衣服做證據,但指對方並無法律知識。(王心義攝)(蘋果日報)


曾鈺成認同李柱銘對《基本法》20條的理解,不應將該條法例視為授權特區政府放棄行使自新權力的法律理據。(王心義攝)(蘋果日報)