香港
台灣
北美

【壹週刊賣盤】總編痛心:唔只生意更係一種價值 如賣員工落妓寨

即時要聞 
2017-07-17 17:50:19 HKT

【新增短片】
《壹週刊》副社長兼總編輯黃麗裳接受訪問時指,對於《壹週刊》賣盤,坦言「預咗有今日」,但她仍感痛心,「令人最痛心係大股東黎智英先生作出呢個決定」,今早她在高層會議前眼濕濕亦是因為對黎智英感失望。據知她曾在會上激動拍枱,質疑交易是「賣員工落妓寨」,她直認不諱,「係同員工分享之後嘅感覺嚟嘅」,承認當時較激動。

對於賣盤,她認為光榮結業是更好的選擇,但「CEO(行政總裁張嘉聲)講到公司考慮到同事嘅飯碗,但壹週刊並唔只是一盤生意,而是一種價值,過去香港出現大是大非嘅時候,(壹週刊)某程度上都有影響力,相信CEO嘅睇法同我哋做編採嘅係有啲南轅北轍。」

被問到易主後《壹週刊》能否保持原有風格,她坦言:「冇㗎啦,仲有呀?冇㗎啦,如果單deal(交易)完成,9月尾交畀黃浩營運,所謂嘅壹週刊價值、壹週刊精神已成過去。」她指讀者亦不要預期看到以前的《壹週刊》,「壹週刊係某時間、有班咁嘅同事、咁嘅leader下出現嘅產物,時代唔同咗啦。」她坦言自己只會工作至9月尾,「我同壹週刊嘅緣份已盡,緣盡就散。」至於會否有同事跟隨離開,她指應由同事自己決定。

對於有員工質疑《壹週刊》營運出問題並非全因政治打壓,她認同,「唔賴得哂政治打壓架,係咪策略上有冇錯誤?其實冇人知條路點行,但有啲嘢係咪反應可快啲?係咪追hit rate(點擊率)就可以有生意?」她指現時回想,只能形容是「不務正業」,「同行有冇輸得咁慘呢?我哋過去投資好多令hit rate好啲,推數碼化,但響雜誌未必適合。」

95年畢業後加入《壹週刊》的她,斷斷續續在《壹週刊》工作已有20年,「好享受呢20幾年,壹週刊畀了個好平台我哋做個有尊嚴嘅記者,咁我好滿足。」以往金融風暴、人物訪問,與同事一同追新聞都令她印象深刻,「試過訪問個人,第二日就收恐嚇電話,回想好刺激。」

被問到《壹週刊》結業是否有如在時事雜誌界滅了某一種聲音?她稱:「可以咁講,因為今日環境仲可以容許有一份咁嘅週刊生存,時代唔同咗啦。」她回憶起前年記協晚會的紀念品,是一樽鹽,令她印象深刻,「做記者好想有尊嚴,但呢個世界冇錢就冇尊嚴。」至於蘋果日報是否應引以為鑑?她指不敢說,但承認未來的路不易行。她最後寄語員工,「壹仔到呢步,大家好難過,希望大家到9月底要保持《壹週刊》精神,做好新聞。」


朱永倫攝(蘋果日報)

相關新聞