香港
台灣
北美

【李八方online】譚仔阿姐腔薯片VS抽水王胡官

即時要聞 
2017-05-19 22:29:04 HKT

【新增短片】
香港記者協會周五晚舉行49周年籌款晚會,兩位特首落選人薯片叔曾俊華同胡官胡國興都有出席,仲同台飲返杯添。薯片叔一開始用譚仔阿姐腔同大家打招呼「大家巧」,話係現在最流行嘅本土腔調。

佢哋仲齊齊抽鼎鼎水,薯片被主持曾志豪問到周浩鼎時,薯片主動叫全場叫鼎鼎個名,全場即時好齊心大叫「鼎」,胡官仲叫寸爆鼎鼎,話今晚好多大狀律師喺度,希望水準可以比鼎鼎高啲咁多喎。

主持問兩位如果新政府組班搵佢哋,會點樣推卻?薯片話佢做咗幾十年嘢,現在終於可享受吓人生,依家有機會行行企企,希望再行行企企下先喎。

胡官就話推吓先,因為依家學緊嘢,例如瑜伽,又講笑話遲吓跟薯片揸的士,皆因薯片之前為幫鑽的宣傳,義務客串做的士大佬。

主持亦有問,信唔信今次係真選舉,薯片話都真嘅,只係自己入波唔夠多,胡官都話應該真,但下面有幾多真就唔知了。

主持仲特別搵咗張FF藝人政府班子圖出嚟,薯片同胡官爭住做嘅特首就由劉德華做。主持問佢哋覺得自己同華仔有咩唔同,薯片笑住話同佢爭一百磅,胡官就話自己無劉華咁靚仔,台下即時話唔係,氹得胡官好開心。


王子俊攝

相關新聞