香港
台灣
北美

勇士教練差啲被拉 普波域治食花生︰幾乎笑死!

即時體育 
2017-05-17 11:20:09 HKT

勇士教練米克朗講述自己被警察無視的經過

勇士星期二(香港時間星期三)喺NBA季後賽西岸決賽主場對馬刺,繼續由米克布朗頂替傷病中嘅卡爾做主帥,不過賽前記者會米克布朗居然遲到,而佢有好好嘅解釋,因為佢喺返緊Oracle Arena嗰陣差啲就畀差人拉咗,而佢喺記者會上講番當時情況嘅時候,仲透露馬刺教練普波域治打電話畀「食花生」,話自己睇到晒當時情況仲幾乎笑死㖭!

米克布朗講番當時情況,佢話自己揸住架SUV、載自己個仔同幾個朋友去緊Oracle Arena,後面就係馬刺隊巴,點知去到Oracle Arena之前最後一個燈位,有交通警要求佢停車,米克布朗指住自件衫個球隊logo,話畀對方知佢係勇士教練,但警察嘅反應係「我唔理,唏,你停低!」米克布朗喺自己地頭畀警察恰點都有啲唔高興,佢諗住再行唔理對方,點知再有一個交通警出現,問佢聽唔聽到,又叫佢停車。米克布朗又諗住對方揸電單車,如果自己再行快啲或者可以嚇到對方,點知再有一架SUV出現,仲用「大聲公」叫佢即刻停車,米克布朗話︰「我開始驚,就好似有五個警察包圍住我,所以我就停低咗。」

米克布朗話︰「我同佢哋講我係要去比賽,所以我畀馬刺隊巴同18個警察過去先,之後我就收到馬刺教練普波域治電話,佢話『Mike,我唔知係你呀……我見到架黑色Range Rover,見到啲警察包圍佢,見到部車仲想加速,我以為佢實畀人拉』,我話『Pop』,呢度係我主場,佢就話『我知,當我見到係你,我幾乎笑死咁滯。」

至於普波域治喺賽前記者會亦繼續食花生,佢話︰「應該要有人教佢(米克布朗),當有加州高速公路巡警叫你停車,你就要停車。佢冇咁做,但真係好搞笑。」

相關新聞