› 選擇地區
三藩市
紐約
洛杉磯
其他美國地區

【李八方online】脫苦海前high到爆 譚志源大灣遊喪自拍

即時要聞 
2017-04-21 17:24:26 HKT

譚志源喺港珠澳大橋好興奮,捉埋鄭耀棠selfie。譚志源提供相片

特首梁振英高度重視、重視到要帶兩司六正副局長去睇嘅粵港澳大灣區城市群,今日終於結束行程返港,呢個團嘅特色之一,係隨團官員中唔少表明唔會過渡至林鄭班子,當中表表者梗係率先表態離開熱廚房嘅政制及內地事務局局長譚志源。唔知係咪諗起就快脫苦海,加上人在外地好鬼high,譚局此行不時selfie,仲要擺相喺微信同朋友開心些牙。

梁特重視呢次考察,從佢日前話此行「規模大、人數多、層次高、代表性廣泛」可見一斑!有份一齊遊大灣嘅譚志源,似乎對離開打咗30年嘅政府工一啲不捨之情都冇,考察期間不時手舞足蹈,春風得意,譬如去睇港珠澳大橋,佢就拎出手機紥好馬自拍,自己影都唔夠喉,再捉埋行會成員鄭耀棠一齊留影。

除咗自己,隨團嘅記者當然不時會影到佢,佢有時見到記者影相,仲會整個鬼臉畀傳媒。雖則呢次考察行程都幾緊密,但無阻譚志源享樂心情,例如夜晚就跟行會成員林健鋒一齊去食宵夜。過多幾個月就無官一身輕,確實會難掩喜悅之情嘅!。