香港
台灣
北美

【李八方online】幫迪士尼拉票?張宇人請食餅 泛民耍手擰頭

即時要聞 
2017-04-21 16:54:05 HKT

葛珮帆最初都對張宇人請食迪士尼嘅餅起疑心...林俊謙攝


黃定光好捧場。

立法會財委會今日開會討論係咪向廸士尼注資50多億元擴建,由於部份建制派都唔支持,議案未算十足把握過到關,而支持撥款嘅自由黨飲食界議員張宇人,唔知係咪想幫忙拉票?今日特別喺廸士尼酒店嘅新餅房,買咗40個有廸士尼公仔造型嘅西餅,話要請開會嘅同事食。

民建聯葛珮帆見到啲餅,一開始就覺有啲唔妥,問張宇人:「廸士尼請我哋食餅咁大鑊?」,張宇人即時派心丸澄清:「係我請你哋食餅呀!」,先令葛珮帆定返唔少。

張宇人之後嘗試搵白鴿黨黃碧雲食餅,但黃碧雲一睇到,即刻大嗌:「好飽喎,唔食!」,仲笑張宇人身型肥似身懷六甲,之後就拔足離開。張宇人其後再捉莫乃光入房食餅,莫乃光一見啲餅即刻問:「係咪翻版嚟㗎?」,果然好關注版權;當知道啲餅嚟自正版廸士尼時,佢就話:「唔使嘞,我肥呀,太肥呀」,力抗西餅誘惑。