› 選擇地區
三藩市
紐約
洛杉磯
其他美國地區

【李八方online】千呎辦公室準備就緒 等住袁國強7.1後回歸

即時要聞 
2017-04-21 16:36:48 HKT

去意已決嘅袁國強,已經有個千呎辦公室等住佢。蘋果日報

候任特首林鄭月娥新班子仍然未齊腳,唔少人拒入由女大廚主理嘅「熱廚房」,現有班子願留任嘅亦唔多。八方早前報道過,現任律政司司長袁國強決定7.1後告別政府,並已準備重返Temple Chambers搵真銀。

有法律界中人透露,近年健康麻麻嘅袁國強早於去年未選出新特首時已經表明去意已決,據知袁國強嘅友好近日已經為袁準備好約一千呎辦公室,準備佢7月離任司長並過咗半年「冷河期」後重操故業。

而喺資深大律師鄭若驊盛傳拒絕林鄭邀請接替袁國強後,建制派不時協助林鄭物色新人選,日前就連律師會前會長王桂壎同私隱專員黃繼兒亦榜上有名。八方聽聞,建制派早喺特首選舉前都不停幫林鄭搵人,有人曾詢問大律師公會前會長譚允芝及監警會前主席翟紹唐有冇意接任,據聞譚允芝最初表現決絕,後來卻口風放軟話「選完至算」。

至於翟少,據聞對出任司長興趣不大,原因同搵錢無關,而係佢一向好關心兩名愛女成長,「每隔一、兩個月,就要飛去倫敦睇對寶貝女」,做咗司長咁困身就好難去探女咯!