› 選擇地區
三藩市
紐約
洛杉磯
其他美國地區

【李八方online】追打港獨冇mood應酬?5年酬酢費見CY特首路興衰

即時要聞 
2017-04-21 07:30:55 HKT


人類都是感情的動物,就算對北京唯命是從到加零一如特首梁振英,相信都有喜怒哀樂嘅!八方並唔係話信口雌黃,而係從特首辦回覆特別財委會、有關梁振英過去5年嘅公務酬酢開支而推論出嚟。

話說梁振英上場嘅12/13年度,公務酬酢開支有成46萬多,當然有部份可能係上手煲呔曾搞farewell啦,但去到13/14年度都仲有成38萬多,又係,梁特苦候多年,終於登上特首寶座,開心到成個彈起之餘,梗係會搵唔同界別人士擦餐勁,收風兼威風一下。

但去到14/15年,即刻跌到接近8萬5蚊,點解呀?一方面梗係要賴佔中啦(呢點八方都係學建制派㗎咋),佔中令到梁特冇晒心情玩,另一方面梁特又要專心工作喎,例如佢喺2015年就發表咗針對港獨嘅《施政報告》,可見係時候減少應酬,的起心肝做嘢啦!

到咗本應該係收成期嘅15/16年,梁特就輕鬆返啲,事關當時佢都應該相信,連任不是問題,所以一年裡面係咁易用18萬蚊左右!

而剛結束嘅16/17年度就同政局一樣好鬼複雜喇!截至今年2月底,梁特已經花咗27萬元多去應酬,唔知當中有幾多場同時有人預祝佢連任成功,但大家都知道啦,佢喺舊年年尾突然收到大信封,隨時因為預祝變餞別,又要使多一筆喇。

查實梁特涉及另有一條數,叫做非實報實銷嘅酬酢津貼,過去5年徘徊喺76萬多至89萬多不等,總體嚟講係越嚟越多。

相關新聞