香港
台灣
北美

【李八方online】社創拔尖班 CEO幫大學生「補習」

即時要聞 
2017-03-20 20:33:59 HKT

邱達根(左)都係其中一位CEO導師。社創基金提供相片


五強隊伍大合照。

教育永遠都係最好嘅投資,難怪有班CEO百忙中抽空幫大學生補習,講緊嘅包括荔園主席邱達根、新鴻基金融行政總裁梁永祥、Impact Hub創辦人伍進超等,社創基金邀請佢哋擔任「社創CEO大專賽」導師,為最後五強同學仔提供一對一指導,藉佢哋嘅管理經驗同創業知識,幫班同學仔脫胎換骨。

其實呢五強係喺初選139份營商計劃中獲選,名副其實係拔尖班。五個營商計劃分別圍繞社會共融同關懷長者兩個預設題目,支援嘅對象包括低收入人士或家庭、無家者、中風患者、健老及有家居清潔需要的長者等;當中有以提高醫療及復康質素為目標嘅計劃,亦有針對協助長者同無家者嘅方案,帶動能力提升同社區資源有效配對。

特首大家就話無票喺手啫,呢個比賽就冇小圈子任人投,市民即日起至4月6日可以登入比賽投票網站 (www.sie.gov.hk/siceo-vote),睇完五強短片後投選心水隊伍,支持佢哋成為「最受歡迎獎」得主。勝出嘅隊伍會獲得高達30萬港元啟動基金,喺社區中實踐計劃,投票者都有機會中獎㗎!