香港
台灣
北美

【八方剝花生】盛傳仲有女高官 因為奶媽梨花帶雨?

即時要聞 
2017-03-20 14:00:23 HKT

鄭汝樺(左)同林鄭不咬弦係官場公開嘅秘密。蘋果日報

「我想哭但是哭不出 等到思念像海 淹沒我而愛已不再...」

睇見呢場由中聯辦悉心掌控嘅選舉,睇到兩邊陣營「粉粉」不平,無票嘅普通市民,可謂欲哭無淚,而極有可能成為香港首位女話事人嘅林鄭月娥,就被揭曾經鬧到政務官大喊一場,包括財經事務及庫務局常任秘書長(庫務)謝曼怡(Elizabeth)...雖然E謝已經否認,強調會緊守崗位,但唔少人都話空穴來風...

其實官場流傳因為林鄭而梨花帶雨嘅女高官,唔只E謝一個。有知情人士話呀,聽聞蔡潔如Kitty Choi都係林鄭威權下嘅受害人。

睇返吖,Kitty喺2012年7月16日出任行政署長,林鄭亦喺同年喺梁班子中任政務司司長,既然行政署直屬CS Office,工作壓力可想而知,所以有傳Kitty喺佔中爆發之時,被林鄭鬧到喊,呢點實在不足為奇,跟林鄭做嘢嘅人,通常忍耐力都係要超凡。

八方聽聞,遠至林鄭未做政務司司長之時,亦試過搞到女同僚流淚。官場早已流傳曾班子年代,即係林鄭做發展局局長之時,經常因土地及房屋問題同時任運輸及房屋局局長鄭汝樺(Eva)開拖,有傳兩女某次仲入咗上司嘅office嘈交(邊位上司?有啲留白好似好啲!),結果係Eva委屈到即場爆喊,上司見到都無可奈何,唯有提示「嗰邊有紙巾」打圓場。

有Eva嘅老友同八方講,Eva話佢冇喊過,眾所周知Eva都係堅強嘅女士,總之在任官員之時,只想做好份內嘅事,聽落係咪有啲可圈可點?

無論以上傳聞係咪真都好,八方覺得3.26之後嘅政府總部,放定多啲紙巾都未嘗唔係好事喎。

相關新聞