香港
台灣
北美

【老公詐型】胡杏兒佗B七個月仲周圍飛 Philip下令停工等生

娛樂要聞 

15年胡杏兒嫁俾Philip做人妻,婚後兩公婆開行turbo全力造人,終於得米!今年母親節杏兒宣布有喜。佗B七個月,大肚婆堅持返內地為新劇跑宣傳,搞到老公冇晒符,惟有親自出馬做貼身保鏢陪住飛。離港一星期,週五(1日),李生李太孖住返港,個肚愈黎愈大,但杏兒行動依然好敏捷,keep住摩打腳行得勁快。為免老公再詐型,杏兒都識做,暫時減產專心安胎。

上個月初,杏兒唔理老公反對,同「胡說八道會」班好姊妹飛去澳洲拍特輯,搞到Philip鬼咁擔心,要拜託班姊妹幫手實老婆,仲喺ig留言問:「捨得回家嗎?」返港唔夠一星期,杏兒又要開工喇!今次Philip親自出馬做「跟得老公」,陪住四圍去。「今次要去廣州、北京再去上海宣傳,Philip明知老婆唔錫身,大住個肚都仲係冇時停,所以幾忙都要請假去看實佢。不過杏兒都應承佢今次係最後一個trip,之後留喺香港專心安胎,暫時唔會再有大probject,最多只會出吓event囉!」杏兒身邊人透露。

講得出做得到!回港後,杏兒第一時間在ig宣布要抖一抖:「This is my last trip before BB Lee arrives,not allow to fly anymore!」大肚婆終於肯定性養胎,Philip可以放心喇!落機當日,兩公婆前後腳出閘,Philip拉住兩個大喼,杏兒就負責拉細喼,佗B七個月,杏兒冇乜走樣,著住黑色連身裙,側面睇巨肚現晒形,雙腳仲明顯出現水腫,雖然粗身大細,但杏兒依然好敏捷,出閘後九秒九行去停車場。至於Philip,護送老婆出閘後,將行李交俾司機,自己又再趕下場,一支箭匆匆離去。

相關新聞

更多 壹週Plus 文章