香港
台灣
北美

民建聯葵青區小花郭芙蓉 疑用辦事處開班

時事要聞 

最近《壹》仔收到投訴,話葵青大白田區民建聯區議員郭芙蓉,涉嫌違反區議員守則,租借自己議員辦事處俾社區組織「大白田新動力」搞收費嘅暑期班,懷疑佢拎完政府開支津貼租用辦事處,轉頭又租借俾其他組織。嘩,聽落好好賺喎。

《壹》仔特登去到郭芙蓉位於和宜商場嘅辦事處度睇睇,豆潤咁細嘅辦事處,除咗職員嘅辦公桌之外,仲擺咗兩張摺檯。一個後生仔同《壹》仔講,平常都係由佢教班。《壹》仔假裝話想幫屋企嘅小朋友報名,佢首先問我地住邊,因為暑期班係「大白田新動力」會員優先報名,而要成為會員,條件就係要「住喺附近嘅幾棟私樓」。咦?咁咪即係郭議員嘅選區範圍?

我地再查一查,發現「大白田新動力」註冊地址正正係郭芙蓉議員辦事處,連聯絡電郵都係佢嘅電郵。點解郭議員搞暑期班,唔落自己個名,要落「大白田新動力」呢?活動收支又點計先?

郭芙蓉回應查詢嘅時候,多次強調「大白田新動力」唔係佢嘅組織。但當我地問到點解組織註冊地址係佢議辦,佢就大耍太極,話呢個其實只係一個非牟利既社團組織,希望為居民提供活動和資訊,開班絕對無牟利,又話落佢電郵都只係因為「協助去幫忙接收資訊」喎。


更多 壹週Plus 文章