› 選擇地區
三藩市
紐約
洛杉磯
其他美國地區

【厭食打亂生理】12歲開始節食 中大女生困擾7年:唔鍾意自己大臀部

時事要聞 

馮一芯(Samantha),二十歲,中文大學新傳系學生。中學時患上厭食症,一度需入醫院接受治療個多月;體重回復正常,但心靈未痊癒。大學時期,她再度節食,令體重下跌至八十多磅。

「我自細係完美主義者,讀書好叻,寫得一手好字,如果筆記寫得唔靚,我會全頁唔要,由頭寫過。」

「十二、三歲時,我跳舞好勁,係班上最叻嗰幾個之一,但慢慢發現,我開始落後,我唔想咁。當時我覺得自己個屁股好大、小腿又粗。細個唔識,以為食少啲就會瘦,每日就減食量。我會喺日記寫低早午晚食咗咩,仲專登寫喺最後嗰頁,因為媽媽唔會睇。我會專登揀夜晚上跳舞堂,可以避開同家人食飯,就無人知我食咁少。」

「早餐只食一啖穀物、午餐一杯果汁或橙、晚餐幾條菜加一個包,人哋一餐係我三餐。量愈來愈少,甚至飲杯果汁、食粒糖。我計數唔叻,但計卡路里就好勁,女仔要千六卡以上卡路里,但我就食三百卡。」

「十四歲,媽媽見我太瘦帶我去睇醫生。醫生話我心跳率低,再咁落去會暈。」

「原來我有厭食症,要即時入院。住院五個星期,感覺好無力。醫院每日安排餐單俾我,又會開營養奶,質地好杰又有陣鐵味,真係好難飲。出院後,每星期都要返醫院,上磅輕咗,醫生會加量;如果重咗,自己個心又會唔舒服。直到磅數夠,醫生同屋企認為我好番。不過我M已經停了幾年。」

「大學住Hall,會食消夜、飲咖啡,我肥咗。同學話我好得意、圓碌碌,會搣我,其實我好介意。我再次節食。」

 

撰文:黎雅婷

攝錄:葉漢華

相關新聞:

【食素醫好厭食】不理阿媽反對 食素令「她」來了:我好自豪

http://bit.ly/2ugpgct

相關新聞

更多 壹週Plus 文章