香港
台灣
北美

林鄭軍師李律仁升呢失敗 「升仙」難過造王

時事要聞 

三十會召集人、大律師李律仁喺特首選戰中,做Laughing Gor示範「變節」,由原本撐曾俊華到最後轉投林鄭陣營仲加入競選辦做副主任。大家以為佢喺林鄭當選後會更上層樓有一官半職,點知佢講明無意加入新班子,本來如意算盤係升呢做「資深大律師」,但最終「升仙」失敗。

做SC(Senior Counsel)打官司每堂出庭隨時收幾十萬,等如司局長成個月人工,識得揀梗係搵真銀好過入熱廚房。但其實「升仙」失敗亦冇咩大不了,因為「升仙」本身就好難,前終審法院首席法官李國能一○年時就講過,委任資深大律師比率唔高,回歸頭十三年,平均成功率只得百分之三十八點六,今年更罕有地只得陳樂信大律師一個「升仙」。

大狀想「升仙」,首先要過最少十年執業呢個門檻,再有兩個資深法律界人士做推薦人,然後,終審法院首席法官會諮詢大律師公會主席、律師會會長,以及曾經審議過申請人案件嘅法官,以肯定申請人喺某一法律範疇有出色貢獻同成就。查實,連埋新鮮出爐嘅陳樂信,香港現時只係有九十九位資深大狀,一百人都唔夠。李律仁○六年先喺香港取得本地大律師資格,即係剛剛夠門檻無耐,將來仲有大把機會嘅。

撰文:時事組


更多 壹週Plus 文章