香港
台灣
北美

長毛捐「禮義廉」Tee拍賣 送都冇人要

時事要聞 

民主派政黨同組織不嬲都缺錢,每年搞籌款晚宴都要向同路人揼心口,好似上星期六晚,華人民主書院就搞咗個籌款晚宴,都係搵余若薇、劉小麗等人題字畫畫,余若薇嘅墨寶最值錢,最終以十六萬元成交賣出。

當晚長毛都有份捐出拍賣品,包括一件有佢親筆簽名寫上「長毛」嘅「禮義廉」Tee,呢款Tee當年由高登仔放喺社民連年宵攤位寄賣,點知民建聯向海關投訴侵權,結果俾海關扣起晒,但之後告都冇告,但已經冇機會賣,所以毛哥捐出嘅呢件,可謂私人珍藏。

不過,呢件拍賣品當晚冇人舉手競投,毛哥於是再拎埋由朋友送俾佢嘅哲古華拉Tee出嚟,笑稱「買一送一」,仲話如果冇人要佢自己買番。結果哲古華拉Tee一出,即時吸引好多人爭,有位女士仲撲出嚟搶住買,但就強調唔使送埋件「禮義廉」Tee俾佢喇,完全反映大家對「禮義廉」嘅不屑。最後多得哲古華拉,為華人民主書院進賬咗二千蚊。

撰文:時事組


相關新聞

更多 壹週Plus 文章