› 選擇地區
三藩市
紐約
洛杉磯
其他美國地區

【Hermès餐具一套30萬】4千呎安樂窩 徐淑敏幫老公打造私人宴會廳

娛樂要聞 

徐淑敏與黃浩 結婚踏入第八個年頭,孻女Isabella(沁誼) 眨吓眼已經兩歲大,嫁雞隨雞, Suki徐淑敏與老公屋企人同住至今,由清水灣到大埔, 都係住屋,不過,「之前兩間屋都冇乜歸屬感!」Suki說。

直至一四年買下這個四千呎的安樂窩,即使一家七口, 四個大人各自對新屋有意見,但Suki仍強烈覺得:「 終於有家的感覺。」

有個勁開明的奶奶和只對自己房間出意見的姑奶, 這幢四層的安樂窩,內部裝潢完全任由Suki兩公婆隨意發揮。 黃浩負責廚房、書房,至於客飯廳以及主人房,就由Suki話事。

一樓的開放式廚房以及可以容納供十二人的飯廳,是全屋的靈魂所在。做過飲食生意的Kenny識飲識食,亦會在家宴客親自下廚,更負責整個廚房設計,至於特別搵人訂造的十二人特長餐枱,則是Suki的得意傑作。「比我預計的還要做得好!」Suki說因為餐枱太長的關係, 要分開兩截運到飯廳再組裝。

Suki去完瑞士學餐桌布置後,又到日本學廚,自此愛上儲餐具,現在最貴就是一套 Hermès餐具,值三十萬。飯廳的壁畫和壁枱上的玻璃擺設,以至餐枱的擺設, 都是女主人親自搜羅,壁枱的水晶裝飾網購自美國Godinger,每件擺設都只需幾百元港幣, 已營造到雅致的效果,這是她最滿意的。

餐枱旁有兩組入牆櫃,放了近二百隻不同類別的酒杯, 包括十幾對Swarovski水晶酒杯。想當年,Kenny在品牌專門店見到這些酒杯曾暗忖:「嘩! 三千幾蚊對酒杯咁貴,有冇人會買嚟用㗎!」每次新居入伙, 收到各方的入伙禮物,正是一對對水晶酒杯, 幾年間儲落一堆名貴酒杯。

曾是蒲場常客的黃浩,婚後修心養性,愛招呼知己返屋企開飯。 收樓後,Kenny已下定主意將廚房改成開放式, 但對於擺位陳設,一直三心兩意,最終出動老友、 囍宴老闆Jacky Yu(余健志)幫手策劃。

因為空間夠, 可選用愛下廚之人夢寐以求的island式廚房設計, 中間既有電磁爐也有明火煮食,另外還有兩個蒸爐及兩台焗爐, bar枱位除了設置壽司櫃,更有家用的鐵板燒裝置。

「只要相熟的海鮮檔有帆立貝或者大蝦返貨, 我就會煮俾Vianna同Renee食,極之方便, 所以個鐵板都用得密㗎!」Kenny說。

靚屋同名牌家電掛鈎,但萬萬聲的Sub-Zero雪櫃不見, 全屋竟然一致地用較實惠的Siemens家電,真係估佢唔到!Kenny說︰「冇計,open kitchen一定要用個特強嘅抽油煙機,Jacky同我睇過, Siemens係最強效, 加上當時呢個品牌個雪櫃技術更勝Sub-Zero,為咗歸一啲, 索性所有電器都用晒佢!」

吧枱對出有一排四個酒櫃,相當壯觀!清酒、紅白酒、香檳、 威士忌一應俱全,朋友到訪驚嘆存酒量, 還會佩服Kenny捨得豪花幾十萬置酒櫃,結果, 每次男主人都忍不住將自己得意的慳錢伎倆,公諸於世。

「原裝買一組有四格嘅酒櫃,真係幾十萬走唔甩, 但個冷凍系統一壞咗,成個櫃就無用!而一個獨立四層高嘅酒櫃, 只是萬幾蚊,我買四個,再搵人做個鋼框入牆櫃, 將四個酒櫃嵌入去,七、八萬已經搞掂!」Kenny沾沾自喜說!

最棧鬼係呢個法國品牌嘅家用鐵板燒,好睇又實用,盛惠六萬八。屋外面仲有個咸水魚缸養海鮮,每個月淨係清潔費都要三千!

 

 

 

 

相關新聞

更多 壹週Plus 文章