› 選擇地區
三藩市
紐約
洛杉磯
其他美國地區

上海仔回港之勝和選老坐》勝和山頭爭坐館 新界澳門富豪三支水

時事要聞 

這一屆新任和勝和坐館,ETB、寸仔和阿祖,亦代表了這幫會的三大勢力。ETB是荃灣猛人傻澤的門生,而勝和的荃灣線人馬,一向在社團中到是實力雄厚,「傻澤係超級大哥傻福既門生,傻福係澳門撈賭廳撈到風生水起,身家豐厚,係社團出名既有錢人。所以好多荃灣既勝和仔,都可以有機會過左澳門搵食,搵唔少錢。古惑仔就係咁,有錢聲都大的。」

除了有錢,傻澤這條「水」亦出名人多疊馬,而且個個打仔格好勇鬥狠,其他社團也不敢招惹他們,「佔中時期,阿爺搵古惑仔做野,荃灣線就派左唔少人做爛頭卒,到旺角佔領區打人生事。當時旺角晚晚打到七彩,好多都係荃灣線既勝和仔。」

至於寸仔,他雖然是上水陀地白頭福的門生,但力撐他上位的,反而是因「江湖飯局」為人熟悉、被稱為勝和太上皇的囝囝。「囝囝係元朗收地撈得好掂,好多大地產商,好似新鴻基同新世界,都會搵佢幫手收地。而且囝囝同鄉紳關係好,知道邊個地方會發展,就預先收地等收購,真係搵到盤滿砵滿,身家最少幾億。」此外,囝囝亦和中聯辦關係良好,不時替阿爺「做事」。

而囝囝亦明白,若能把親信捧上去做坐館,對自己「生意」上有很大幫助,所以一二年時,他亦豪使數百萬,支持子騰做坐館,「囝囝呢次為左捧寸仔上位,都使左唔少錢,勸服左好多元老,投寸仔一票。」由於囝囝財雄勢大,加上寸仔又和幫中元老雞腳黑關係良好,所以即使早前寸仔中了「針」(警方臥底),他最後仍能當上辦事人。

而力撐阿祖的上海仔,亦是社團中另一股勢力所在。上海仔雖然沒有特定的地盤,但因為他在江湖名氣夠大,很多有錢人遇上麻煩,都會找上海仔幫手,他亦因而結識不少名人富豪。亦因為上海仔瓣數多多,所以不少勝和古惑仔,也改投到他門下跟他搵食,「好似阿祖,佢本來係跟前坐館陳安出身,後來都轉左去跟上海仔搵食。」

上海仔今次能夠成功捧阿祖上位,關鍵在於他籠絡到一班仍在油尖旺打滾的元老,如國華、大飛、大華和四眼柱等,「油尖旺以前就係油水地,依家已經唔同晒,間間夜總會都冇生意,酒吧又賺得唔多,馬檻執完一間又一間,真係搵唔到錢。」因此,善於交際的上海仔,順利「說服」一班活躍這裡的元老,令他們支持阿祖。

這次勝和選老頂,雖然未引起江湖廝殺事件,但警方亦十分關注,而早前已先後「邀請」三名新辦事人到警察總部「傾偈」,「警方都擔心會好似水房咁,爭坐館搞到互相仇殺。所以同佢地三個講,點樣選都好,一定唔可以打交,否則警察會做野。」一名反黑探員說。

撰文:艾馬、程志康
攝影:金文、王晴

 


相關新聞

更多 壹週Plus 文章