香港
台灣
北美

中環在線:邢李㷧9億思捷股份贈兩女 - 李華華

財經要聞 

邢李㷧(左二)同3名寶貝女感情要好。

思捷(330)創辦人邢李㷧,一手創立Esprit時裝王國,早年成功喺高位沽貨套現逾200億離場,堪稱財金界傳奇。直到2012年,邢李㷧趁思捷供股救亡之際,突然出手翻兜,掃入思捷10.97%股份,當時大家仲揣測佢是咪打算復出。
不過現實係,邢李㷧早已退休,掛住打golf,買思捷只當財務投資。呢批貨持股5年,一直冇郁過,直到今個星期,邢李㷧忽然將呢筆總值逾9億元嘅股份,轉贈畀兩名愛女,認真大手筆。

16歲細女冇份

據聯交所資料,邢李㷧本周一將原本由旗下信託持有嘅2.118億股思捷,轉移到一間名為Total Market Limited嘅離岸公司,呢間公司由邢李㷧大女邢嘉倩與二女邢愛林各自持有50%,股份來源寫明係「獲給予」,即係爸爸送嘅。
以思捷噚日收市價4.27元計,即兩姊妹各人持股,賬面值4.52億元。當年邢李㷧平均入貨價為每股8至9蚊,保守估計總成本約19億,即呢筆投資賬面上係蝕緊53%。
邢李㷧有3名寶貝女,邢嘉倩係邢李㷧與前妻張天愛所生;二女邢愛林同細女邢言愛,就係大美人林青霞所出。可能因為細女今年只得16歲,仲未成年,所以今次送股份未見有佢名。而年僅21歲嘅邢愛林,據聞已擁有中半山The Mayfair一個逾億元豪宅,睇來邢李㷧近年都逐步將身家轉移畀下一代。

李華華
mailto:LiWaWa@AppleDaily.com