香港
台灣
北美

夏日求驗客:杜Sir寸摩佬必泊大巴
雙紅會先打口水戰

蘋果波經 

「雙紅會」禮拜六早場先踢,不過雙方嘅口水戰一早就開始!利物浦名宿杜格利殊就過料畀領隊高路普,預言曼聯領隊摩連奴將會繼續以「泊大巴」嘅戰術應付大戰,又叫高路普繼續貫徹其進攻踢法,唔使擔心後防甩漏,寧願球隊前面入多幾粒,都唔想睇到球隊死守1:0贏悶波咁話,似乎寸緊摩佬賴以成名嘅「1:0戰術」喎!不過一向自負嘅摩佬就一於少理,揚言球隊今季表現比上季好,上季作客都可以打和,今季仲唔食硬「利」?


曼聯前線着晒火

曼聯今季前線着晒火,聯賽七場轟入21球咁多,唔只得新加盟嘅盧卡古腳風順,拉舒福特、米希達利恩都狀態火熱,就連去季頹爆嘅馬迪爾都有復蘇迹象。不過利記名宿杜格利殊就睇死曼聯領隊摩連奴,帶隊作客晏菲路一定唔敢再強攻:「上季摩連奴嚟到唔只係『泊大巴』咁簡單,而係泊左多架雙層巴士,我認為曼聯今仗都會繼續着重防守囉!」
利迷叫得佢做「國王」,杜Sir當然信心十足,賽前就向高路普教路,話摩連奴肯定會嗌佢啲前線球員,不斷向利物浦施壓,所以雙方都會有壓力:「我對高路普充滿信心,一定會搵到破大巴嘅方法!」近期紅軍表現麻麻,不過杜Sir表明力撐高路普嘅性感足球踢法,認為好啱球會風格,仲話寧願睇住球隊驚險咁贏3:2,都好過睇住隊波小勝1:0咁悶。


摩連奴反擊:勁過紅軍

畀杜Sir挑機後,曼聯領隊摩連奴就話,睇番球隊今季戰績明顯比上季進步,𠵱家六勝一和排第二,點計都好過近四場聯賽更只得一勝、排緊第七既利物浦嘞!摩佬話:「我覺得我哋表現好啲喎,可能好多人會話我哋都未對過其他Big 5,成績唔可以作準,但我哋上季主場冇辦法擊敗愛華頓同韋斯咸,作客亦贏唔到修咸頓,今季就做到晒。」
摩佬總結話,曼聯今季表現比上季出色,上季都已經拎到兩個錦標,今季表現更好但唔代表會同上季一樣成功,言談間胸有成竹。大家都各有論點,未踢之前一於先召喚獎門人出嚟:「打和啦,Super!」