香港
台灣
北美

【馮仁昭四圍超】「家陣相處易啲」
陳瀅、猷亨有約會

娛樂名人 

蔡卓妍(阿Sa)、陳瀅同鄭希怡噚晚喺中環ifc出席Maje時裝活動,陳瀅春風滿面,問到之前俾讀者影到國慶日同賭王四房大仔何猷亨睇煙花,佢就否認復合:「冇拍拖,我仍然係單身,嗰日商場出面有煙花睇,有幾個朋友一齊,淨係影到我同猷亨,係普通朋友聚會。」
陳瀅仲話暫時冇機會復合:「同之前講一樣,大家關係由情侶變成朋友,相處更加簡單同易啲。」佢又承認間中有同猷亨單獨約會,但感覺唔到對方追佢,指大家近年都要專注事業。有人提議過幾年後各自未有另一半就復合,陳瀅笑言:「古時住埋同一條村就可能冇人一齊就相約番一齊,每日識唔同朋友,但係未有男朋友。」


陳瀅日前同何猷亨睇國慶煙花,噚晚出活動時春風滿面。


鍾浠文(左)噚晚同陳瀅(中)出席喺中環ifc嘅時裝活動。


阿Sa笑言想同阿嬌一齊結婚,可以慳錢。


鄭希怡噚晚受訪時,大呻同囡囡拍真人騷體會甜酸苦辣。

Twins約埋結婚

另外,阿Sa透露已見過阿嬌新男友「醫界王陽明」賴弘國,更講笑話可以考慮兩對情侶約埋拍拖,阿Sa話:「唔方便透露,總之拍檔開心,我都開心。」有提議Twins一齊結婚?阿Sa話:「以前有諗過,覺得兩個一齊搞會大型啲,同埋慳啲,都係同一班朋友,一次過搞晒。」問到會唔會有計劃?佢話:「有呢啲幻想,冇話一定,隨緣。」
撰文:馮仁昭