香港
台灣
北美

隔牆有耳:重型車破風
黃金寶單挑石油氣哥 - 李八方

專欄專論 

阿寶試踩雄哥嘅重型戰車,花咗啲時間先適應到。旅發局圖片

前單車世界冠軍黃金寶復出喇!阿寶呢次要面對嘅係一位同樣來香港嘅單車手,聽聞呢位車手人稱雄哥,今年經已65歲。前排阿寶同雄哥會面過,驚覺香港車壇卧虎藏龍,究竟呢位雄哥係何方神聖?
是咁的,下月8號舉行嘅香港單車節,阿寶就係呢次單車節嘅大使,主辦機構旅發局就搵嚟隱世高手雄哥同阿寶較量。來自深水埗嘅雄哥本身係一位石油氣送貨員,因為送貨,佢踩車資歷有30年咁耐。雄哥嘅戰車係一架英國造、淨重至少72公斤嘅單車,若果加埋7罐石油氣,總重量可以去到300公斤,絕對唔講得笑。
平時踩開炭纖造、極輕車身單身嘅阿寶,膽粗粗試踩雄哥嘅重型戰車,結果要花啲時間先適應到,難怪佢話:「香港車壇卧虎藏龍!」講番單車節,下月8號當日,阿寶會參加30公里組嘅活動,如果大家都想一睹佢嘅風采,可以留意番旅發局網頁!