香港
台灣
北美

【馮仁昭四圍超】阿澤搞網媒
收背心見習生

娛樂名人 

杜汶澤識飲識食就係人都知,估唔到佢請人都好有眼光。佢日前喺facebook登招聘,前日就貼出一名索女倒瀉奶相後公告:「啱啱請咗人,嚟我公司做見習生,返12點收12點,你哋覺得佢個款,似唔似做得嘢呢?」阿澤新請的索女見習生立即被起底,名叫楊浩兒,鍾意曼聯連英文名都叫Manchester,身材弗爆嘅楊浩兒當然唔會吝嗇喺Instagram晒水着相。


阿澤新請嘅女見習生叫Manchester,身材夠惹火。互聯網圖片

講明睇心胸

阿澤原來同幾個友人集資搞網媒,所以招兵買馬,阿澤噚日話:「見習生要抹地、執枱、斟茶遞水一腳踢。」又話楊浩兒自我介紹叫「狗妹」。阿澤否認面試以貌取人:「出嚟社會做嘢,心胸必要廣闊。佢嚟見工着吊帶背心,佢話返工都係咁着。」狗妹未返工即熱爆網絡,阿澤會唔會開戲畀佢?佢話:「佢真係請返嚟抹地,冇講呢啲,一切由抹地做起。佢一夜成名,分分鐘紅過Celine(譚芷昀)。」阿澤預告佢個網會晚晚搞live show,仲會同「腦細」林日曦crossover。
撰文:馮仁昭


同朋友集資搞網媒嘅阿澤(中),已有一連串計劃。