香港
台灣
北美

演大軍對付星爺夠經典
程東回歸「我都唔係咁醜啫」

娛樂名人 

「花你都打到我夫佬?咁你老竇都變鬼佬!」27年前的電影,對白和場口仍然令人記憶猶新,程東飾演的大軍功不可沒,也許只有他才能駕馭特異功能師傅這騎呢角色。近日程東回港拍戲,直言恨做男主角的他笑言:「我都唔係咁醜啫。」
採訪:何永寧、馮國康


近年在內地扎根的程東,坦言希望返港拍多些港產片。攝影:陳俊強


程東在《賭俠》飾演懂特異功能的單眼佬大軍,堪稱經典。劇照


程東與星爺在《整蠱專家》大鬥法,躓對方食「誠實豆沙包」。劇照

身邊的不知是大軍還是程東,左眼沒戴隱形眼鏡,亦沒有招牌的單手掩眼動作。豪邁爽朗的笑聲,絕對不是電影中配音的那把,「可能講程東冇人識,但你一講到大軍,個個都知係邊個。」久違香港影壇多年的程東,早前回港拍戲並接受本報獨家訪問,說到《賭俠》這經典角色時眉飛色舞:「當時有個氣功大師叫李建軍,公司即刻開戲叫我演佢。點做呀?整隻眼鏡你戴先!」戲中另一幕經典是大軍被周星馳催眠,化身成《秦俑》的鞏俐:「焚身以火呢句實識唱啦!結果呢幕嚇醒咗好多觀眾。」


和小生合作得多的程東,當年曾與黎姿合演《獄中龍》。資料圖片

演幾十年反派

原來程東入行時是製片,自己也不知有喜劇天份,只因當年演員不夠,被向華勝捉去做幕前,程東說:「嗰時係80年代尾,香港電影最興旺嘅時候,唔好話台前幕後,人都唔夠。」比較準確一點,其實是奸角不夠,相反小生多的是,與他合作過便有劉德華、星爺和黎明等,他說:「可能我生得冇咁靚仔,導演嚟親都叫我演大哥,要我戴條大大哋嘅朱義盛,唔經唔覺就演咗幾十年反派。」
說起來,程東跟江湖電影特別有緣,他在《古惑仔情義篇之洪興十三妹》飾演的鹹濕哥更是賤到入骨:「嗰個年代開嘅江湖片、動作片太多,反派演員真係數唔到有幾多個,大儍(成奎安)又變咗喜劇演員,三歲細路仔都唔驚佢。」當年他試過一日踩五組戲,累到洗澡都可睡着:「你知做我哋呢行,好天搵埋落雨柴。拍,你就有錢囉,可以供樓囉!」當年曾傳出影星收不到片酬,問到可有發生其身上,程東笑說:「可能我做反派做得多,未試過收唔到。」


程東笑言可能做反派做得多,未試過收不到片酬。


程東在內地吃得開,開影迷見面會大受歡迎。微博圖片

北上發展娶妻

90代末,香港電影業萎縮,程東試過一年只拍兩日的客串戲:「嗰個年代都算係一個好慘淡嘅年代,扮女人得唔得呀?扮女人都冇喇,冇嘢撈。」02年程東拍完《反收數特遣隊》後,把心一橫北上發展,轉型做廣告,「我諗我哋每一個呢行嘅人都經歷過,由開始唔願放棄到要走,一年拍唔到兩日戲,生存唔到呀,要供樓供車。」不過有失總有得,這十多年間,程東在內地搵到食,做過導演拍攝《蔡李佛拳》,更娶到嬌妻,現已是一子一女的父親,「我老婆唔係欣賞我拍戲,可能係緣份,大家啱,咁就結婚。」
程東現時在內地扎根,參與很多內地的電視劇和網絡電影,但說到底,他依然想返港拍戲:「好渴望第日搵我啲製片啊,唔好搵我返嚟三、兩日,男主角可以考慮吓我,我個樣都唔係咁醜啫!」

相關新聞