› 選擇地區
三藩市
紐約
洛杉磯
其他美國地區

八方相當年:
被鬼仔吐口水 鄭泳舜靠打波化解 - 李八方

專欄專論 

孭住保良局前主席鄭錦鐘公子呢個身份,民建聯深水埗區議員鄭泳舜(Vincent)都幾頭痕,因為有個富爸爸,成日被懷疑打唔打得?查實佢同唔少人一樣,經歷過屋邨仔時代,同樣好「打」得,皆因籃球、排球、羽毛球乜都啱。中四隻身赴新西蘭讀書,試過伙俾鬼仔向佢掟嘢兼吐口水,最終亦係靠「打」,化干戈為玉帛。


Vincent細個就跟老竇鄭錦鐘出席地區活動。鄭泳舜提供圖片

第一份工$8,500「俾人搵笨」

37歲嘅Vincent憶述細個住深水埗南山邨時,老竇參與好多社區活動,佢經常跟住四出做義工。細個唔多like讀書,成績自然普通,自爆無「波」不歡,「但就完全唔識踢波」。中學時搬入屯門,中四赴新西蘭升學,最初半年獨自住喺當地家庭,當時嘅佢好有少男情懷,對中學同學依依不捨,「幾乎日日寫信畀佢哋」,至今keep住同呢班同學聯絡。
Vincent話最初抵埗都有種族歧視,試過有人突然向佢掟嘢兼吐口水,最終一一化解,「我鍾意運動,就多啲同啲同學一齊打波,打打吓就熟絡咗」。
新西蘭奧克蘭大學讀統計學,畢業後2003年回港,沙士爆發市況奇差,「第一份工喺廣告設計公司做,當時得嗰8,500蚊人工,仲要成日中港兩邊走,可能俾人搵笨,哈哈」。之後轉工做商場租務同管理,一做3年幾。
身為胡杏兒姐夫嘅佢2006年入黨、2007年當選深水埗區議員至今,最近勝出黨內遴選,或代黨披甲迎戰九龍西立會補選。


鄭泳舜(圓圖)喺深水埗南山邨長大。