香港
台灣
北美

與林鄭棄前嫌 劉業強:佢𠵱家可話事

要聞 

劉業強回應議會出席率包尾,指應重質不重量。
朱家駿攝

【本報訊】林鄭月娥未任特首前常與新界人「開拖」,由取締僭建到取消丁權拳拳到肉,「林鄭態度唔同咗啦:『坐得高、望得遠』吖嘛!」,剛獲邀加入行政會議的鄉議局主席劉業強承認,部份村民對林鄭仍有憂慮,他為林鄭說好話,相信今時不同往日,新政府料更重視新界人意見,「佢(林鄭)舊時嘅位點同呢個?嗰時做司長,畀個制度控制,𠵱家做特首可以自己話事!」

冀政府重視新界人意見

林鄭上任後首站落區選了北區,向新界人示好之意極濃,「其實佢當日新界、九龍、港島都走勻啦」,行會新「智者」劉業強不以為然,但承認林鄭重視新界問題,透露如大浪西灣等新界土地納入郊野公園一事,「佢都好關注,有次仲自己講起」。
走訪過27鄉的劉業強直指:「啲鄉(民)係好多怨氣」,不滿政府偏聽觸發城鄉矛盾,「好似洪水橋發展係切割式,將新市鎮同鄉村分割,鄉民同鄉委會成日嘈,但政府都唔肯聽」,「東涌都係啦,喺村界之後唔郁你、亦唔發展,周邊啲樓就圍住佢哋,但設施就乜都冇,城鄉關係梗係唔會好」。
劉直指上屆政府冷待新界人意見,「你睇吓嗰啲諮詢委員會,有幾多個新界人喺度?城規會都冇呀,咁點討論?」強調村民往往因此有失落感,「佢哋由村民做到村長再上,意見都係被吸納」,冀林鄭上場後撥亂反正,直指「以前個高小姐(中策組前顧問高靜芝)負責㗎嘛,但以往係由下而上推薦人入諮詢架構,民政專員權力應提升,呢啲地方官同地方關係最密切,知道地方人士能力」。
問及林鄭上任政務司司長之初曾指應為丁權設限,倡2047年(即《基本法》50年不變後)截龍,劉業強解圍稱:「居住同樓價高嘅問題,政府對所有(解決)方法樣樣都要諗,工廠大廈、閒置土地、貨櫃、岩洞、郊野公園乜都諗㗎啦」,但他也稱,市民對此涉及法律的丁權問題,或有誤解,政府某程度有責任向公眾說明新界原居民的權益。
至於林鄭任發展局時稱要嚴打的丁屋僭建,亦激起鄉紳眾怒,劉業強稱當局其後推出的理順登記計劃,亦獲原先不認同的村民所接納,相信若再重推,「有村民會跟隊」。
問及「子承父業」四隻字經常與他連在一線:接棒鄉議局主席、當選立法會鄉議局界別議員,就連立會的低出席率亦與父親劉皇發看齊,於大會、內會與財會「封王」。人稱「發仔」的劉業強稱未來會研究時間分配,坦言議會工作外,落區安排亦密麻麻,加上超級馬迷不能放棄入場跑馬仔,分身不暇,「所以屋企都唔使點理,可能得5%(時間)畀屋企」。
■記者許偉賢