香港
台灣
北美

智取大市:大升市換馬策略 - 晉佳

投資 

港股上周連升5日,技術未見超買,暫時唔估頂。 資料圖片

港股連升5日,冇一日主板成交超過1,000億,買需未消耗盡。升完5日,9日RSI都仲係70.55,未感覺到技術超買,仲要連續裂口,未見大成交就代表一直只係保持續性裂口,最快點都等到單日成交超過1,100億(往績見頂訊號之一),先有可能形成消耗性裂口,到時先考慮沽貨。升浪末段越見激情,暫時唔估頂。
面對大升市,可用一套簡單策略應付,首先每日諗定手頭上走勢最差、最冇前途嘅一兩隻股沽出,同時每日揀選一至兩隻機會最好嘅股份,揀股可以睇圖或睇公告,亦可留意美股前一晚炒乜。每日透過呢種方式換馬,直至成手都係走勢好嘅強股為止。近日最強勢莫過於燃氣股、汽車代理股同商品股,但去到上周五龍頭中燃氣(384)同中升(881)都見回吐壓力,資金本周初應該會轉向。

科網股近期升得嚟偏靜,但美國科網股進入業績期,有望炒上。內房股上周五有中海外(688)突破,升勢龍頭恒大(3333)、雅居樂(3383)、碧桂園(2007)反而保持待變格局,相信北水並非放棄強勢轉追落後,強勢內房或有新一輪攻勢。龍工(3339)剛破頂,論圖表係建築機械股之中最強,要追龍頭就要快手。

晉佳
http://www.fb.com/advanceguy1
本欄逢周一、三、五刊出