香港
台灣
北美

隔牆有耳:
「愁眉飯」同枱 
暖男泰博勸酒 為鼎解憂 - 李八方

專欄專論 

民建聯周浩鼎撐咗幾日,噚日終於撐唔住要辭立法會UGL事件專責委員會個位,點知佢講完辭職後同區議會主席食飯,竟然抽到同熱血公民「泰博」鄭松泰同枱,八方梗係問泰博,阿鼎仲食唔食得落餐飯?泰博講笑話,佢有叫阿鼎飲多兩杯,醉咗就冇嘢,不過阿鼎就唔肯飲。
噚日係立法會安排同區議會正副主席定期飯局,之前向秘書處報名食飯時,仲未知自己會爆出醜聞的阿鼎,飯前喺陳克勤陪同下宣佈辭任專責委員會個位後,就去咗宴會廳食飯,同場仲有近日炮轟佢嘅公民黨楊岳橋同「泰博」鄭松泰,以及委員會主席謝偉俊。雖然阿鼎遲到近半小時先到場,但估唔到佢咁「好彩」,得四分一機會中,都抽中同鄭松泰同枱!

指應聚焦689

八方喺飯局後問泰博,阿鼎有冇喺飯局乜嘢講、心情如何?泰博話知道民記飯後即會召開黨團會議,「(神色)好似有啲凝重」,但指議會都係建制派獨大,「所以(周浩鼎)都食得落飯嘅」,佢席間有問阿鼎飲唔飲酒,因為跟住內會都會討論譴責阿鼎,泰博笑稱:「諗住希望佢(阿鼎)飲醉,冇乜嘢嘅,但佢唔飲,冇辦法啦」。
泰博又話,阿鼎份人冇乜嘢,「同佢平時啲行為一樣……大家都理解啦」,覺得阿鼎辭去委員會職位係基本,但成個問題重點係佢犯咗公職人員行為失當,所以呢個先係法律上的問題所在,焦點始終係689,「周浩鼎只係顯示出佢一貫嘅……作風啫」。

李八方

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk