香港
台灣
北美

水神進軍荷李活?
費斯變沙灘拯救隊

體育要聞 

「各位先生女士,歷來贏到最多奧運獎牌、「23金」先生、宜家係沙灘拯救隊最新成員」……以上係曾經做摔角手但現時主力拍電影嘅The Rock狄維莊遜,喺佢嘅個人Instagram同大家分享一段短片嘅留言開場白。

The Rock講嘅「23金先生」當然即係贏過23面奧運金牌、總共28面奧運獎牌嘅美國游泳好手「水神」費斯(又譯菲比斯)啦,咁到底係搞邊科呢?其實就係為咗The Rock嘅新戲《沙灘拯救隊》(Baywatch)做宣傳啫。套戲下星期就喺美國上畫,費斯冇份拍戲嘅,只係喺宣傳片出現,佢同The Rock講話想加入沙灘拯救隊,除咗騷獎牌證明自己游水夠快,又做埋閉氣同急救測試,最後「夢想成真」同一班性感索女喺沙灘度一齊跑㖭。估唔到「水神」演技原來幾好,唔知佢第日會唔會考慮進軍荷李活呢?