香港
台灣
北美

【NBA】76人蠢唔晒 艾比迪頂薪合約有保留

即時體育 
2017-10-11 12:00:10 HKT

《ESPN》引述聯盟消息人士報道,雖然76人已經同中鋒艾比迪(Joel Embiid)達成協議,以1億4,800萬美元(約11.55億港元)同佢續約五年,但係呢份新人級別頂級合約對球隊嚟講並唔係完全無保障,當中都有一啲條件係叫做保護到76人。

報道話喺呢份超過35頁嘅合約當中係存在一啲條件,令艾比迪有可能拎唔足頂薪。據報喺呢份2022/23球季後完結嘅五年合約當中,如果艾比迪喺最尾四個球季因為受傷而缺席25場或以上嘅常規賽,又或者打唔足1,650分鐘,76人就有機會啟動合約當中嘅條款,裁走艾比迪慳番啲人工。不過,又唔係話所有傷患都計數㗎喎,因為艾比迪之前搞到缺席兩個球季嘅傷患係腳傷同埋背傷,所以合約都列明只係呢兩個部位嘅傷患先至計數,touch wood講句如果艾比迪膝頭同手腕受傷,76人係無得放棄艾比迪㗎。

如果真係咁唔好彩發生咁嘅情況,76人喺2018/19球季後決定放棄艾比迪,佢都會拎到成份合約當中嘅8,420萬美元,之後按球季遞增至2021/22球季嘅1億2,940萬美元。不過,如果艾比迪新合約期內連續三季打到最少1,650分鐘,又或者由今季起計,四個球季之內有三個打到最少1,650分鐘,76人都係唔郁得艾比迪,又或者裁咗都係無著數,一樣要畀咁多錢。

相關新聞