香港
台灣
北美

隔牆有耳:教青年抗爭
社民連開班 培訓小長毛 - 李八方

專欄專論 

薯片叔叔曾俊華喺特首選舉力谷休養生息論,唔少溫和民主派都好鬼buy,白鴿黨主席胡志偉唔知係咪受感染,最近仲提出特赦和解論㖭。之但係堅持抗爭嘅丐幫社民連一於話之你,嚟緊6月初至8月底續辦抗爭青年實習計劃,由創黨主席長毛梁國雄同主席吳文遠加埋一班有心人,教授抗爭秘技,咪以為一定係武鬥,文鬥一樣可以好出色,據知佢哋會教大專生點樣做政策研究、推動自己關心嘅社會議題。
八方問過文遠大將軍,佢話社民連俾政府政治打壓嘅官司特別多,所以一眾參加計劃嘅後生仔,嚟緊好多機會出入法庭,同時可以去立法會幫手睇文件,亦有機會學吓點樣組織示威,兼且使用多媒體宣傳理念,賣花讚花香話「真係好過癮」。

保證安全 唔會逼人上街

但大將軍都溫馨提示,參加得呢個計劃嘅後生仔,相信都會知呢項經歷,對自己將來份CV冇乜幫助,所以佢相信參加者真係認同社民連理念,過往唔少人最終仲加入埋社民連。
唔少政團過去搞抗爭,時有同警方爆衝突,文遠大將軍就大派定心丸,話會確保參加計劃嘅年輕人安全,絕對唔會逼人參加遊行示威。佢坦言過去有家長對子女參加呢種計劃擔心,但子女參加完兼同家長講解後,反而令家長知道計劃好安全兼好多嘢學。
據知名額唔多,有意參加嘅可填妥網上表格( http://goo.gl/PgBA3D )報名。

李八方