› 選擇地區
三藩市
紐約
洛杉磯
其他美國地區

體壇拾趣︰
少女欄后奪金 港隊豐收

體育要聞 

「相對於金牌,『時間』更重要,跑出接近13秒嘅時間,係最好不過嘅生日禮物。」16歲嘅天水圍中四生盛楚殷(Kiko),噚日喺江西南昌舉行嘅全國少年U18(16-17歲)田徑錦標賽女子100米欄,造出14秒05個人最佳時間奪金,可惜超風速(+2.3),但Kiko話係自己下月12號最佳生日禮物。


香港一金四銅嘅獎牌功臣中,佩琦(左二)同楚殷(右二)細個曾跟葉啟德教練訓練。照片由香港田總提供

就讀天水圍循道衞理中四嘅Kiko,中一先開始練跨欄,本月初精英田徑賽喺100米欄造出個人最佳時間嘅14秒29奪冠;嚟到今次全國少年賽,Kiko喺初賽以14秒48第一名入決賽,可惜決賽出現超風速,佢造出嘅14秒05唔計入七月世少達標時間,但無損Kiko嘅信心,佢話:「雖然超風速,但做到𠵱個時間,我都好滿足,證明我係有能力跑到嘅,比金牌更重要。」上海嘅何欣怡以14秒33奪亞,季軍係14秒47嘅江蘇鐵人嘅姚慧。
香港田總今次派出17名青少年田徑代表出戰全國少年賽,共奪得一金四銅,其中一面銅牌得主係100米跑嘅德望女飛人陳佩琦,佢噚日出戰4x100米接力決賽,以47秒35得第四名。其餘銅牌功臣仲有男子跳高嘅林衍澤、男子100米跑嘅謝以軒同男子4x100米接力隊。