香港
台灣
北美

【英甲回流】17歲港產門神挑機
輸畀葉鴻輝神反應

娛樂名人 

「覺得自己已經好叻,但係去到英國見到人哋咁勁,自己憑咩資格咁大牌呀?」年僅17歲嘅港超小將謝家榮去年到英甲球隊貝利學法8個月,令呢位無知的小孩一晚長大。


比起葉鴻輝嘅速度,家榮真係差幾皮呀!


兩位第一次見面,大家都尷尷尬尬,認真搞笑


呢場比賽嘅winner係...阿輝!家榮唔洗咁傷心喎


阿輝真係贏九條街呀,睇吓個紙皮箱就知

謝家榮憑住高大身型(身高達184米)及敏捷身手,年紀小小已經喺青年同學界賽事「響晒朵」,更被譽為「葉鴻輝接班人」。佢小學四年級接觸足球,話起初都冇諗過要成為守門員,「一開始踢中場同前場比較多,到小五嗰時參加咗一個叫計劃,咁啱有個龍門教練嚟咗,係我O依家嘅師傅張景驊『華B』。佢問邊個有興趣守吓龍,咁我嗰時就想試吓,於是就跟佢練習,慢慢發覺自己適合守龍多過出嚟踢,所以就繼續守落去。」家榮細細個就被捧到上天,坦承曾經囂過:「一開始喺香港,喺青年聯賽嗰度覺得自己大佬咁,就算一兩個月唔練波,教練都係出我。出到去守,我又守到喎,唔會有咩犯錯,應付到青年軍個節奏。」直至有機會去英甲球隊貝利學法,先醒覺「自己憑咩資格咁大牌呀?」

本身係車路士足球學校學員嘅家榮,去年隨隊到英國踢友誼賽,佢同隊友林樂勤(Jordan)嘅表現俾球探睇中,更獲得英甲球隊貝利開出學徒合約。留英短短8個月,家榮捱咗唔少苦頭:「一開始入到更衣室,佢哋唔會主動同你握吓手或者Say Hi,唔會同我哋講野,接近係當透明囉!嗰班鬼仔自己有自己傾,你哋兩個嚟就嚟,你哋自己搞掂。」除咗受到隊友冷淡對待,家榮仲要飽受思鄉之苦:「最唔慣係啲生活,去到英國乜親人都冇,得我同Jordan兩個。每日練完波就返屋企對住四幅牆,日日喺度撳電話。除咗踢波,基本上都係等瞓覺。喺英國有咩唔開心、有咩傷、有咩病,都冇乜同媽咪講,因為唔想佢擔心,老實講,未試過咁掛住屋企人。」


喺英國8個月,家榮只有林樂勤Jordan(右)陪住(受訪者提供圖片)


經過英甲球隊貝利嘅訓練,令家榮明白天外有天嘅道理(受訪者提供圖片)

捱過、跌過先會學懂珍惜;家榮話嗰8個月學到好多嘢,「一個禮拜都練5日左右,佢地所有嘢都好有系統,就算係青年軍已經好似職業足球員咁,因為要銜接上去一隊,所以佢哋嘅訓練模式都同一隊差唔多。」家榮記得有一次試腳,有位嚟自愛爾蘭國家隊嘅曼城龍門Ian Lawlor外借過嚟,「佢係94年,只係比我大5年,但係已經有咁高水準,諗返其實自己又係啲咩呢?憑咩資格去囂張?」喺英國,「落場」再唔係必然嘅事,家榮原本以為可以正式為貝利披甲出戰青年聯賽,卻事與願違:「喺英國表現都算可以,但最後就係因為註冊問題,聯賽踢唔到,等咗半年都係註冊唔到。」對於未能註冊,家榮雖然覺得可惜,但佢冇放棄呢個足球夢,回港加盟港超球隊理文流浪,登上香港超級聯賽嘅舞台。

同樣以17歲之齡成為職業足球員嘅大師兄葉鴻輝又點睇呢個接班人?究竟「英雄輝」又會過啲咩招畀家榮旁身?記得留意下條動新聞!

文、採:植詠珊(Cathy)
攝影:Teddy﹑Kaman
剪、編、導:Roy

緊貼「蘋果VR」熱潮,打開雙眼隨意門,讓「蘋果VR」陪您探索新世界: https://goo.gl/b5RQAB

「蘋果VR」App
App store下載: https://goo.gl/0kW2cK
Google Play下載: https://goo.gl/4K7EHw

相關新聞