香港
台灣
北美

智取大市:中堅份子勁當炒 - 晉佳

投資 

昂納科技有5G加無人駕駛概念,近日科網股熱炒,昂維係次線好選擇。 資料圖片

科網股炒風驚人,股價強勢確立,不如由佢放紙鳶。龍尾股如雲遊(484)、神州數字(8255)炒得狼過龍頭股,其中,雲遊炒高28%,收市升14.8%,報10.08元,但全日成交平均價係10.37元左右,唔少人去到收市要捱價。龍尾股基本因素較弱,往往得短線客埋身肉博,波幅大,不易駕馭,寧願輕鬆揸實龍頭仲好。
當然,龍頭龍尾中間,仲有樣嘢叫中堅份子,市值細,基本因素唔差。昂納科技(877)係次線好選擇,5G加無人駕駛概念,繼續炒科網,跟住升嘅理由夠晒堅實。

昂納科技發展傳感器及光雷達業務,管理層舊年預期無人車用光雷達2018年後應用,換言之,除5G帶嚟新訂單之外,昂納稍後仲有新增長點。
昂納股價回勇其中一個原因,係BAT裏面開發無人駕駛技術較積極嘅百度,近日發佈名為「Apollo」嘅自動駕駛平台開放計劃,將向汽車行業及無人駕駛領域嘅合作夥伴提供軟件平台,幫助生產商結合車輛及硬體系統,快速搭建屬於自己嘅完整自動駕駛系統。此舉鼓勵汽車生產商加大無人駕駛研發,提高行業成功機率,昂納自然受惠,雖說產品2018年後應用,但股價嘅嘢,或提早反映。

晉佳
http://www.fb.com/advanceguy1
本欄逢周一、三、五刊出