香港
台灣
北美

【add時尚】李嘉欣生活對碰

名人時尚 

46歲美魔女李嘉欣2017年頭幾個月,可謂考驗多多,新年遇上日本50年一遇大風雪,全家滯留北海道;之後滑雪又撞傷尾龍骨。李嘉欣日前受訪,就坦言會經常提醒自己要開心,「睇住Jayden轉眼已經6歲,我更加會好好珍惜,每日把握同佢一齊成長。」跟囝囝打乒乓、游水、看他畫的畫,簡簡單單已經令嘉欣很快樂。
撰文:林妙萍

李嘉欣今年第四次出任「愛彼錶女皇盃大使」,早前輕性感露腿拍攝宣傳照,示範新錶,駕輕就熟,日前受訪時她對此說:「賽馬係我先生家族活動,有馬出賽時,心情都會幾緊張,頒獎就輕鬆啲 。」


Audemars Piguet
皇家橡樹霜金自動腕錶
$447,000



Audemars Piguet
皇家橡樹超薄腕錶
$435,000

同兒子打乒乓

問嘉欣剛過去的復活節假期,一家人如何度過?她說:「之前滑雪撞傷尾龍骨,𠵱家仲要做物理治療,要等兩個月先好番,暫時唔可以坐長途機,同埋做劇烈運動,所以都係近近哋飛吓!」不再滑雪,改打乒乓球?「尾龍骨傷,好多運動都暫時唔能夠做,相對打乒乓球比較溫和,嗰次係上第一堂,之後可以同Jayden一齊對打。以前覺得乒乓球係幾男仔嘅玩意,學咗又覺得幾好玩,原來好講速度、反應,手腳腰都要好配合,幾好玩。」
講開囝囝Jayden,不經不覺已經6歲,嘉欣坦言非常掛念囝囝小時候,但亦都享受囝囝長大的變化,「以前佢喺報紙雜誌見到我啲相,會覺得好奇怪,咁我每次都有解釋畀佢聽,有時影工作相,我都帶佢去,等佢明白呢個係我嘅工作,所以𠵱家冇咁八卦好奇,始終佢已經係6歲小朋友。」
我手畫我心,嘉欣有時會陪囝囝玩art jamming ,囝囝隨手畫的畫亦令她最窩心,「咁多年母親節禮物,我最鍾意Jayden畫畀我嘅畫,每次可以睇吓佢內心世界,又可以睇吓佢筆下嘅媽咪係點樣。」獨子,又是家中寶貝,嘉欣寧願做嚴母,都不想囝囝變港童,「唔想Jayden有少爺病,唔想佢覺得全家都以佢為中心,所以我都幾嚴,呢方面我同先生都幾一致。」李媽媽亦是嚴母,「佢好注重我哋要有禮貌同守時,要尊重同包容他人。」嘉欣媽咪亦保養得宜,三母女被影過一齊半島嘆茶、shopping,恍如三姐妹,「謝謝讚賞,我都覺得媽咪係天生麗質,媽咪扮靚心得係我哋三個之中最基本、最簡約,真係唔到我唔佩服。」


嘉欣不要兒子做港童,要他有禮貌及懂尊重。

對美魔女正面

過去幾年,嘉欣都被封為「美魔女」,面對即將的50大關,她坦言不怕老,「呢個稱呼都幾正面㗎,就算80歲都唔怕,最緊要係心態要保持年輕,同埋維持一個開朗積極嘅人生態度,唔好將啲事諗得太多、太複雜。時間呢樣嘢好公平,無論你開心、難過,一分一秒都係咁過,所以我成日提自己要開心,唔好為無謂事情傷腦筋。」

愛彼錶霜金新材

愛彼錶經典作,必數八角形表面的皇家橡樹系列。今年女裝版誕生40周年,請來意大利設計師Carolina Bucci設計閃亮新錶面,以白金或玫瑰金製作、取名為Frosted Gold (霜金)。至於女皇盃2017限量版,今屆以男女對錶為主打,各限量發行200枚。



Audemars Piguet
皇家橡樹女皇盃
2017限量版腕錶
$299,000

電梯自拍女郎

人人都玩自拍,李嘉欣有一個專屬場景:電梯!經常在大廈電梯內自拍,影了一兩年,由秋冬厚褸大衣,影到夏天熱褲背心、去ball禮服等,她更搞笑寫「每年胖一公斤」,嘉欣這樣說:「我都唔記得幾時開始影,有時係匆匆忙忙中,喺嬦度係稍為停一停嘅時間,所以就隨手自拍,當做一個相片日記。」


去年開始玩電梯自拍。

更多精采時尚內容,盡在 http://add.appledaily.com 。

緊貼「蘋果VR」熱潮,打開雙眼隨意門,讓「蘋果VR」陪您探索新世界: https://goo.gl/b5RQAB

「蘋果VR」App
App store下載: https://goo.gl/0kW2cK
Google Play下載: https://goo.gl/4K7EHw